Вазирлар Маҳкамасининг 2014 йил 20 октябрдаги 290-сон қарорига

Вазирлар Маҳкамасининг
2014 йил 20 октябрдаги
290-сон қарорига
3-ИЛОВА
Ўзбекистон Республикаси ҳудудида йўқ бўлиб кетиш
хавфи остидаги ёввойи фауна ва флора турлари билан
халқаро савдо қилиш (CITES) соҳасида рухсат бериш
тартиб-таомилларидан ўтиш тартиби тўғрисида
НИЗОМ
I. УМУМИЙ ҚОИДАЛАР
1. Ушбу Низом "Ҳайвонот дунёсини муҳофаза қилиш ва ундан фойдаланиш тўғрисида", "Ўсимлик дунёсини муҳофаза қилиш ва ундан фойдаланиш ҳақида" ва "Тадбиркорлик фаолияти соҳасида рухсат бериш тартиб-таомиллари тўғрисида"ги Ўзбекистон Республикаси қонунларига мувофиқ ишлаб чиқилган ва йўқ бўлиб кетиш хавфи остидаги ёввойи фауна ва флора турлари билан халқаро савдо қилиш тўғрисидаги Конвенциянинг (кейинги ўринларда Конвенция деб аталади) Иловаларига кирадиган ҳайвонлар ва ўсимликлар турлари намуналарини олиб кириш ва четга олиб чиқишга рухсат бериш тартиб-таомилларидан ўтиш тартибини белгилайди.
2. Ушбу Низомнинг амал қилиши Ўзбекистон Республикасида фаолият юритаётган барча жисмоний ва юридик шахслар учун мажбурийдир.
3. Мазкур Низомда қуйидаги асосий тушунчалар қўлланилади:
СITESнинг маъмурий органи - Конвенциянинг IX моддаси, 1-банди, "а" кичик бандига мувофиқ давлат номидан рухсатнома ёки сертификатлар бериш ҳуқуқига эга бўлган, ҳайвонлар ва ўсимликларнинг экспорт-импорти устидан назорат амалга оширилиши учун масъул бўлган Конвенциянинг миллий маъмурий органи;
тур - ҳар қандай тур, кичик тур ёки унинг географик алоҳида популяцияси;
бериш - ариза берувчига рухсатнома ёки сертификатни тайёрлаш, тасдиқлаш ва топшириш билан боғлиқ барча тартиб-таомилларнинг якунланиши;
дериват - тирик бўлмаган ҳайвондан олинган маҳсулот;
мансабдор шахс - ушбу Низомнинг бажарилишини таъминлаш учун ташкилий-фармойиш берувчи ёки маъмурий-хўжалик ваколатлари берилган шахс;
импорт - қайтариб олиб чиқиш ҳақидаги мажбуриятсиз Ўзбекистон Республикаси божхона ҳудудига ҳайвонот ва ўсимлик дунёси объектларини олиб кириш;