Vaqti: 1-juftlik 09: 00 da Fakulteti

Садри аъзам - вақф мулкларини бошқарувчи.
Санад - Самарқанддаги Улуғбек мадрасасида камида 15-16 йил таҳсил олиб, унинг дастури бўйича фанларни тўла ўзлаштирган ва имтиҳонли сабоқларда ўз билимини намойиш эта олган толиби илмларга бериладиган шаҳодатнома.
Саҳҳоф - китоб муқоваларини тайёрловчи уста.
СеЙИстон - Эроннинг Афғонистон билан чегарадош шарқий вилояти. Милоддан аввалги II асрда кўчманчи сак қабилалари шимолдан Херируд ва Гилманд дарёлари оралиғидаги вилоятларга келиб жойлашишган ва шундан бошлаб бу ҳудудлар Сакистон (Сейистон) деб юритиладиган бўлган.
Секстант - осмон ёритқичларининг баландлигини белгилаш учун мўлжалланган кўзгу-қайтаргичли асбоб.
Соҳибқирон - Қуёш тизимидаги катта сайёралардан иккитасининг бир-бирини тўсиши (қирон) пайтида туғилган одам. Ривоятларга қараганда, Амир Темур икки шарофатли юлдуз-Заҳро ва Муштарий сайёралари бир-бирларига яқинлашган пайтда туғилган экан. Мунажжимларнинг фикрига кўра, бундай одам бахтли, улуғ мартабали бўлиши муқаррар саналган. Амир Темурнинг Соҳибқирон деб аталаши ҳам шундан. Соҳибқирон сўзининг асл маъноси “бахтиёр подшоҳ”, “қудратли подшоҳ” демакдир.
“Султон ул-ҳаттотин” - ҳаттотлар султони. Машҳур ҳаттот Султонали Машҳадий (1432-1520) замондошлари томонидан шундай ном билан улуғланган.
Суюрғол - бирор ҳукмдор томонидан алоҳида хизмат кўрсатган шахсларга берилган инъом. Унинг эгаси давлат солиқларидан озод этилиб, олган даромадларидан ўз ихтиёрича фойдаланиш ҳуқуқига эга бўлган.
Илгари (XIV аср охири-XV аср бошларида) ва айниқса XVI асрнинг бошлари ва иккинчи ярмида ерни суюрғол тарзида инъом этиш вақтинча тусда бўлиб, ер мерос бўлиб ўтмас эди. XVII-XVIII асрларда эса вақтинча берилган ерлар доимий мулкка ўта бошлади ва бу мулкка эгалик ҳуқуқи ворисларга ҳам ўтказиладиган бўлди.
Тавочи - XII-XVII асрларда Ўрта Осиё ва Эронда хон ва подшоҳлар саройида хизмат қилган олий ҳарбий мансабдор. Тавочи зиммасига ҳарбий юриш кўзда тутилганда тобе вилоятлардан озиқ-овқат, от-улов, белгиланган миқдорда лашкар тўплаб келиш ва юриш билан боғлиқ бошқа вазифалар юклатилган.