Ўқув қулланма Тошкент 2011 йил

3.3.4. Абонент ускуналарининг мобиллигини бошқарув функцияси

АУ ларининг мобиллигини бошқаруви «уй» ва мехмон соталарда ишлатиладиган радиотехнологияларга, АУ ни мобил ҳолатига ва ахборот жўнатиладиган ОТЎ даражасига асосланган ҳолда классификация қилинади.
LTE тармоқларида соддалаштирилган кўринишда АУ, мобиллик нуқтаи назаридан, 3.11-расмда кўрсатилганидек, уч холатдан бирида бўлиши мумкин: “Уланмаган LTE” (ингл. LTE Detached), “Ноактив LTE” (ингл. LTE Idle), ва “Актив LTE” (ингл. LTE Active) холатлари.
Бунда «Уланмаган LTE», одатда, ўткинчи ҳолат бўлиб, у АУ ни энди ёқилиб тармоқни қидириш ва унга уланиш жараёнида бўлишига тўғри келади. «Актив LTE» ҳолатида АУ тармоққа уланган ва RRC даражасида eNB тугунида рўйхатдан ўтган бўлади. Бу ҳолатда АУ қайси сотага боғлангани маълум бўлиб, у билан маълумот айрибошлаш мумкин бўлади. «Ноактив LTE» АУ қувватини тежаш ҳолатига мос бўлиб, бу ҳолатда АУ маълумот пакетларини узатмайди хам, қабул хам қилмайди. Бу ҳолатда АУга тегишли контекстлар eNB тугунида сақлаб қолинмайди, чунки АУ нинг территориал жойлашуви фақатгина ММЕ модулига маълум, у ҳам бўлса бир неча eNB тугунидан иборат бўлган «кузатув зонасида» – ТА (ингл. Tracking Area). ММЕ модулига АУ ни охирги марта уланган ТА зонаси маълум бўлади ва АУ нинг жойлашувини аниқлаш учун қисқа хабар – пэйджинг юборилади.

3.11-расм. LTE тизимида АУ нинг мобиллик ҳолатлари

Батафсилроқ равишда АУ ларнинг мобиллик ҳолатини ММЕ модулида сақланувчи ахборотга қараб икки даражага ажратиш мумкин:

• 
  EPS нимтизимида мобилликни бошқариш ҳолати – ЕММ (ингл. EPS Mobility Management);
  
• 
  EPS нимтизимида уланишларни бошқариш ҳолати - ECM (ингл. EPS Connection Management).
  

ЕММ холатида АУ «Рўйхатдан ўтмаган ЕММ» (ингл. EMM-DEREGISTERED) ва «Рўйхатдан ўтган ЕММ» (ингл. EMM-REGISTERED) нимҳолатларига бўлинади. «Рўйхатдан ўтмаган ЕММ» ҳолатида ММЕ модулида АУ нинг айни дамдаги жойлашуви бўйича ахборот бўлмайди, лекин унда АУ нинг ушбу ҳолатидалиги хақида контекст ахборот сақланади ва бу АУ нинг «рўйхатдан ўтган» ҳолатига ўтишида қайта аутентификациялашдан озод қилади. АУ нинг «рўйхатдан ўтган ЕММ» ҳолатига ўтиши ҳар сафар ёки АУнинг тармоқ билан уланишида, ё кузатув зонасини янгилаш - TAU (ингл. Tracking Area Update) жараёнида содир бўлади. Бу ҳолатда ММЕ модули АУ нинг жойлашувини фақат кузатув зонаси - ТА миқёсидагина билади, АУ эса бу холатда TAU процедурасини амалга ошириши, пэйджингга жавоб қайтариши ва чиқувчи маълумот бор бўлса канал ресурси ажратилиши талаб қилиши мумкин (3.12-расм).

3.12-расм. EMM даражасида АУ нинг мобиллик ҳолатлари

ЕСМ даражасида ҳам икки холат ажратилади – «ноактив ЕСМ» » (ингл. ECM-IDLE) ва «уланган ЕСМ» (ингл. ECM-CONNECTED).

«Ноактив ЕСМ» ҳолатида АУ ва ММЕ орасида NAS даражасида хизмат ахбороти билан алмашинмайди, ва АУ учун мўлжалланган контекст eNB тугунида сақланмайди. АУ нинг жойлашуви ТА аниқлиги даражасида маълум, АУнинг жой ўзгартиришларини аниқлаш эса TAU процедуралари ҳисобига амалга оширилади.
«Уланган ЕСМ» ҳолатида АУ ва ММЕ орасидаги хизмат ахбороти алмашуви RRC протоколи, eNB ва ММЕ орасида эса S1 интерфейси орқали олиб борилади. АУнинг жойлашуви сота аниқлиги даражасида маълум ва АУнинг сота ўзгартиришлари «хэндовер» процедуралари билан бирга ўтади (3.13 расм).

3.13-расм. ЕСМ даражасида АУ нинг мобиллик ҳолатлари