Ўқув қулланма Тошкент 2011 йил

3.7. LTE тизимида ахборот хавфсизлигини таъминлаш

Ахборот хавфсизлиги архитектураси ҳамда 3GPP ва но-3GPP тармоқларга рухсат этиш аспектлари 3GPP лойиҳасининг, мос равишда, 33.401 ва 33.402 Техник спецификацияларида баён этилган [34]. Пакетли коммутация домени (ингл. Packet-Switched Domain) орқали хизматларга уланиш АУ ва мобил тармоқ (ингл. Public Land Mobile Network, PLMN) оператори орасида хавфсиз уланиш ўрнатилишини талаб қилади. Мультимедиа хизматларига уланиш учун АУ ва IMS таянч тармоғининг нимтизими (ингл. IMS Core Network Subsystem, IMS CNSS) орасида алоҳида хавфсиз боғланиш ўрнатилиши керак бўлади.

3.7.1. LTE тармоқларида хавфсизликка таҳдидлар

LTE тизимида тармоқнинг турли элементлари ҳамда турли даражаларидаги хавфсизликка таҳдидлар бўлиши мумкин. Масалан, таҳдидлар абонент ускуналари, баъзавий станциялар, MME тугунлари, шунингдек умуман мобилликни бошқарув тизимига нисбатан бўлиши мумкин. Қуйида шулар атрофлича кўриб чиқилади.

3.7.1.1. Абонент ускунаси учун таҳдидлар

IMSI ни ушлаб олиш мақсадида ҳужум
Мобил абонентнинг халқаро идентификатори - IMSI (ингл. International Mobile Subscriber Identity) халқаро давлат идентификация коди - MCC (ингл. Mobile Country Code), оператор тармоғи коди - MNC (ингл. Mobile Network Code) ва мобил абонент идентификатори - MSIN (ингл. Mobile Subscriber Identfication Number) лардан иборат. IMSI нинг умумий узунлигини 15 та рақамни ташкил қилади, улардан 3 таси МСС га ва, фойдаланиш жойига қараб, 2 ёки 3 та рақам MNС га ажратилади. Қолган рақамлар MSIN га алоқадор. Абонент тармоққа ҳимояланган ҳолда уланиши учун у ўз IMSI сини жўнатиши керак. Бироқ IMSI ни ўзи очиқ равишда юборилади, ва шундан келиб чиқадики, ушбу идентификаторни илиб олиш ва кейинги ҳужумлар мақсадида ёки абонентнинг ҳаракатлари ва фойдаланаётган хизматлари ҳақида аналитик ахборотни еғиш учун ишлатиш мумкин. Бу таҳдидни олдини олиш учун АУ ишончсиз тармоқларга очиқ IMSI нинг узатилишини назорат қилиш имкониятига эга бўлиш керак. Бунга умумий ёки симметрик калит билан шифрлашни қўллаш ҳисобига эришиш мумкин.