ЎҚув методика маркази

Машғулотнинг бориши
Тарбиячи: “Бугун биз цирк томошалари ҳақида” суҳбатлашамиз. Цирк томошаларини ёқтирасизми? Эсингиздами, бизнинг боғчамизга ҳам цирк томошалари келган?
1. Қизиқчиларнинг кучукчасини эслай оласизми? У қандай эди? У ҳақида нима дейиш мумкин (кичкина, оппоқ, жингалак сочли).
2. Кучукча айланиб-айланиб рақсга тушиб, қизиқчининг олдига борган эди. Унинг кайфияти яхши эди. Бундай кучукчани биз қандай кучукча дейишимиз мумкин? (қувноқ).
3. “Қувноқ” сўзига яқин сўзлар топинг (шод, хурсанд). Сиз цирк томошаларини фақат боғчада эмас, ота-онангиз билан цирк биносида кўрган бўлишингиз мумкин. Ҳозир сиз цирк томошаларини қаерда, ким билан кўрганингизни гапириб берасиз:
1. Циркка қачон ва ким билан боргансиз?
2. Циркда қандай томоша (ўйин)лар кўрдингиз?
3. Қайси томошалар Сизга кўпроқ ёқди? Шулар ҳақида гапириб, “Менинг циркда кўрганларим” мавзусида ҳикоя тузинг. Ҳикоянгизда ҳозир ишлатилган сўзлардан, гаплардан фойдаланишингиз мумкин. (3-4 боланинг жавоблари).
Бармоқлар машқи
Тарбиячи шеърни ўқиб туради. Болалар ҳаракатни бажарадилар.

Кучукча
Д . Икромова

Соқчиман уйингизга,
Қўриқчи қўйингизга.
Кучукман мен вафодор,
Ҳамма мендан миннатдор.
Хурсанд қилсангиз керак,
Бўлмаса, ташланг суяк.

Бармоқлар зич, бош бармоқни юқорига кўтариш .

Жимжилоқ юқорига-пастга ҳаракатлантиради.
Тарбиячи болаларга “Олапарни чақир” топшириқ ўйинини ўйнашни таклиф этади. Бу ўйинда болалар ўйинчоқ кучукчани жиддий, жаҳл билан, мулойим овозда чақира олишлари керак: “Олапар, менинг олдимга кел”.
Саводга тайёрлаш бўйича амалий машқ
Тарбиячи болаларга турли расмлар кўрсатади. Икки –уч сўздан иборат гап тузишни таклиф этади. “Расмга диққат билан қаранг ва гап тузинг” деб топшириқ беради. Масалан: катта олма; сариқ, момиқ жўжа. Сўнгра тузилган гап сўзларга бўлинади.(биринчи сўзни айтиш, иккинчи сўзни айтиш, учинчи сўзни айтиш)
Тарбиячи машғулот якунида барча болаларни ширин сўзлар билан рағбатлантиради.