ЎҚув методика маркази

Кутилаётган натижалар:
Болаларнинг сўзлашув нутқи ривожланади.
Болаларнинг сўзларни бир-бирига боғлаб, жумлалар тузиш малакаси мустаҳкамланади.
Болалар шахсий гигиена қоидаларига риоя қилишни ўрганадилар.
Керакли жиҳозлар:
“Тиш ювиш одоби” мавзусида сурат
Машғулотнинг бориши
Болаларга кўринарли қилиб “Тиш ювиш одоби” мавзусидаги сурат илинади. Тарбиячи қисқагина кириш суҳбати ўтказади. Болалар, ўз-ўзини парвариш қилиш деганда нимани тушунасиз?(Болалар жавоблари)
Тўғри болалар, ўз-ўзини парвариш қилиш деганда– ўзини тоза тутиш, озода юриш , тишни ювиш, ораста ва тоза кийиниш, тирноқларни озода тутиш, сочга қараш тушунилади . Бугун биз тишларни қандай тозалаш кераклиги ҳақида суҳбатлашамиз.
Биласизми, нима учун тишларимизни ювамиз? (Болалар жавоблари)
Сиз тишларингизни қандай тозалайсиз? ( Болалар жавоблари )
Тарбиячи : Тўғри, болалар, тишларини тозалашда аввал оғиз илиқ сувда чайилади, сўнгра тиш чўткасини сувга ботириб, “Болалар тиш пастаси” суриб олинади ва тишлар жипслаб турган ҳолда олдинга ва ён юзалари бўйлаб ишқаланади. Бунда чўткани пастдан тепага қараб ёки аксинча юргизиш керак. Шундан сўнг оғизни очиб жағ тишларини ва тишларнинг ички юзасини тозалаш керак. Тишларни тозалаб бўлгач оғиз паста қолмагунга қадар чайилади. Қарабсизки тиш тоза бўлади.
Тарбиячи болалар диққатини суратга жалб қилади.
1. Суратда ким тасвирланган?
2. Бола нима қиляпти?
3. Суратга нима деб ном бериш мумкин?
Тарбиячи: Мана энди, суратга қараб ҳикоя тузишга ҳаракат қилинг. Аввал ҳикояга қандай ном беришингизни айтинг? Сўнгра “Бола қаерда тиш ювяпти? У тишни қандай тозалаяпти?” шулар тўғрисида ҳикоя тузасиз. Ҳикоянгизни қизиқарли тугатинг (Болалар ҳикоя тузишда қийналсалар, тарбиячи уларга ёрдам бериши мумкин).
Тарбиячининг намуна ҳикояси.
Мен эрталаб уйқудан турдим. Юз қўлимни совунлаб ювдим. Тишларимни тозаладим. Тиш ювишни менга дадам ўргатганлар. Мен чўткани ушлаб турдим, дадам эса тиш чўткага пастани суриб қўйдилар. Мен чўткани эринмай пастга, тепага қараб юргаздим. Тишларнинг орқа тамонини ҳам тозаладим. Мен оғзимни яхшилаб чайқадим. Шундан сўнг тишларим тоза бўлди. Мен тиш ювганимда сувни исроф қилмасликка ҳаракат қиламан. Сувни исроф қилмаслик бизнинг бурчимиз. Доимо озода юрганим учун, мен соғ- саломат юраман.