Urug’li mevalardan kompot ishlab chiqarish texnologiyasi

Kalibrlash. Sifat bo’yicha navlashdan tashqari meva o’lchami bo’yicha kalibrlanadi. CHunki mexanik ishlov berish mashinalari (tozalash, danakni ajratish va b.) xom ashyo o’lchami va shakli bo’yicha bir xil bo’lgandagina samarali ishlaydi. Mevaning o’lchami va pishish darajasi kimyoviy yoki bug’-issiqlik usuli bilan po’stlog’i tozalanganda, blanshirlanganda, sterillanganda katta ahamiyatga ega. Turli o’lcham va pishiqlik darajasidagi mahsulotga ishlov berganda mayda meva hamda to’liq pishib yetilgan meva ezilib pishishi,
ayni vaqtda yirik va pishib yetilmagan mevada hali issiqlik bilan ishlov berish oxiriga yetmagan bo’lishi mumkin. Undan tashqari har bir bankada bir xil o’lcham, shakl va rangdagi meva konservalanishi kerak. Kalibrlash uchun trosli, valikli, diskli, shnekli, diafragmali mevani massa va o’lchami bo’yicha navlovchi boshqa kalibrlash mashinalari ishlatiladi.
Yuvish. Qayta ishlashga kelgan meva va sabzavot yuzasida mineral va organik ifloslanishlar bo’ladi. Bu ifloslanishlarning asosiy qismi chang bilan birga kiradi. Meva yuzasida atrof muhitdan yuqadigan va hashorat tarqatadigan turli mikroorganizmlar (epifit mikroflora) to’lib toshgan bo’ladi. Yuvish natijasida meva yuzasidan mexanik ifloslanishlar, mikroorganizm va o’simlikka kimyoviy ishlov berishdan qolgan pestitsidlar uzoqlashtirilishi kerak. Danakli meva ventillyatorli yoki yuvib silkituvchi mashinalarda yuviladi, urug’li mevalar – ketma-ket rotorli va ventillyatorli mashinalarda, rezavorlar esa dush ostida yuviladi. Yuvishni intensivlash va samaradorligini oshirish uchun suv bilan yuvishda yuvish vositalaridan foydalaniladi. Fosfororganik, xlororganik va karbonat pestitsidlarini mevalar yuzasidan uzoqlashtirish uchun
ularga yuvishdan ilgari 1 daqiqa davomida 0,5%-li kaustik soda eritmasida ishlov beriladi.