Umumiy o‘rta ta‘lim muassasalarida Aqliy rivojlanishida muammolari bo‘lgan bolalar uchun tashkil etiladigan korreksion sinflar uchun tayanch o‘quv dasturlari

V. Boʻlim. Til va dil
(21 soat)
She’r bo‘ladigan so‘zlar. Til haqidagi she’rni tinglash, unda qo‘llanilgan so‘zlarning ma’nolari bilan tanishish. She’r matni yordamida soʻzlashuv tili
va badiiy nutqning o‘rtasidagi farqni tushunish bilan bog‘liq topshiriqlar ustida ishlash. She’riy matnda ohangdoshlikni hosil qiluvchi so‘zlarni aniqlash, she’riy matnni o‘qish qoidalari bilan tanishish.
Tasviriy ifoda, undan foydalanish. Berilgan matn tarkibidagi tasviriy ifodalarni aniqlash, ularning nutqni boyitishdagi ahamiyati haqida suhbatlashish. Muayyan narsa va shaxslar haqidagi tasviriy ifodalar yordamida 2 yoki undan ortiq gapdan iborat matn yaratish, matnni yaratishda bo‘g‘in ko‘chirish qoidalariga rioya qilish.
Soʻzlarning koʻp ma’no anglatishi. Ko‘p ma’no anglatuvchi so‘zlar bilan tanishish, ko‘p ma’no anglatuvchi so‘zlar bilan bog‘liq mashq va topshiriqlar ustida ishlash.
She’riy nutqga xos bo‘lgan xususiyatlar: qofiya, ohang. Badiiy nutqdagi o‘xshatishlarni va sifatlashlarni tushunish.
Maqolning mag‘zi. Maqollar bilan bog‘liq mavzuda berilgan audiomatnni tinglash orqali maqollar va ularning mazmuni bilan tanishishga oid topshiriqlar. Shaxs va narsaning nomini bildirgan so‘zlar. So‘roq berish orqali shaxs va narsa nomlarini ajrata olish mashqlari.
Berilgan matn mazmuni yuzasidan suhbat qurish, boʻgʻinga ajratilmaydigan soʻzlar bilan tanishish, ularning imlosi va talaffuzi bilan bog‘liq mashq
va topshiriqlar ustida ishlash. Yonma-yon kelgan har xil undoshli va bir xil undoshli so‘zlarning bo‘g‘inlarga ajratilishi bilan bog‘liq mashqlarni bajarish.
Maqollar va gaplarni ular ifodalangan mazmun bo‘yicha tahlil qilish, maqol va gapni farqlay olish bilan bog‘liq mashq va topshiriqlar ustida ishlash.
So‘zlarning ko‘chma ma’nosi. Matnda ko‘chma ma’noda ishlatilgan so‘zlarning ma’nosini kontekstdan tushunish. Matn mazmuniga mos maqol tanlash.
VI. Boʻlim. Fan va texnologiyalar
(12 soat)
Oy Yerdan kattami? Berilgan matnning mazmuni yuzasidan suhbat qurish, matn mazmunini qayta hikoya qilish, so‘zning fikr ifodalashdagi o‘rni
va ma’nolari bilan bog‘liq mashq va topshiriqlar ustida ishlash. Matn tarkibida berilgan atamalarni aniqlash, lug‘at yordamida ularning izohi bilan tanishish.
Fazogirlik kasbi haqidagi audiomatn bilan tanishish. Unda so‘zlar tarkibidagi unli va undosh tovushlarning qo‘llanilishi bilan bog‘liq mashq
va topshiriqlar ustida ishlash. Harfiy birikmalar ishtirok etgan so‘zlarni aniqlash
va ularning imlosi bilan bog‘liq mashqlar.
Qiziqarli kasblar, kasb tanlash haqida suhbat qurish, suhbat davomida kasbga oid so‘zlar va ularning imlosi bilan tanishish. O‘zi tanlagan kasb haqida
ikki yoki undan ortiq gapdan iborat matn yaratish, unda so‘zlarni bo‘g‘inlarga ajratish va gapga nuqta qo‘yish bilan bog‘liq mashq va topshiriqlar ustida ishlash. Tengdoshlar bilan suhbat jarayonida qo‘llaniladigan so‘zlar, ulardan foydalanishga oid mashqlar ustida ishlash.
Badiiy bo‘lmagan (faktik ma’lumotlar beradigan) matnni tushunish. Verbal (matnli) va vizual (grafik, illyustratsiya, jadval va hokazo) kerakli ma’lumotni qidirib topish.