Umumiy o‘rta ta‘lim muassasalarida Aqliy rivojlanishida muammolari bo‘lgan bolalar uchun tashkil etiladigan korreksion sinflar uchun tayanch o‘quv dasturlari

Husnixat darsi: so‘zlarning orasidagi masofani ajratishda bir xillikka rioya qilish, xatboshini ajratish.
III.Boʻlim. Sog‘ tanda – sog‘lom aql
(24 soat)
Foydali sabzavotlar. Berilgan matn asosida d-t, b-p, z-s, j-ch, g-k, v-f undoshlarining talaffuzi, imlosi, d-t undoshlarining talaffuzda tushib qolishi, yozuvda saqlanishi, q va g‘ tovushlari, ularning talaffuzda va yozuvda qo‘llanilishi bo‘yicha mashq va topshiriqlar ustida ishlash. O‘rganilgan qoidalar asosida ikki yoki undan ortiq gap tuzib, o‘z fikrini yozma ifodalash topshirigʻi ustida ishlash.
Tutuq belgisi ishtirok etgan matnlar ustida ishlash, unli tovushdan keyin kelgan va undosh tovushdan keyin kelgan tutuq belgisining vazifasini tushuntirish bilan bog‘liq mashq va topshiriqlarni bajarish. Tutuq belgisi tushib qolganda so‘z ma’nosining o‘zgarishi bilan bog‘liq topshiriqlarni bajarish. Ma’nosi izohlanishi kerak bo‘lgan so‘zlar izohi bilan tanishish, bunda lug‘at va undan foydalanish qoidalariga rioya qilish.
Sog‘lom bo‘lish uchun tana a’zolariga qanday vitaminlar zarurligi haqida suhbat qurish. Bunda insonning tana a’zolarini ifodalovchi soʻzlar va ularning imlosi bilan tanishish. Suhbat jarayonida nutqda so‘roq, buyruq, xabar mazmunidagi gaplarni qo‘llash, ularning ohangi va imlosi ustida ishlash. Belgini bildiruvchi so‘zlar bilan bog‘liq mashq va topshiriqlar ustida ishlash.
Matnning umumiy mazmunini tushunish. Matnga sarlavha tanlash.
Xotiram kuchli boʻlay desangiz. Berilgan matnda shaxs va narsa nomlarining ko‘plikda qo‘llanilishiga e’tiborni qaratish, shaxs va narsa nomlarining ko‘plikda qanday qo‘llanilishi haqida ma’lumot berish. Matn tarkibidagi ma’nosi izohlanishi lozim bo‘lgan so‘zlar izohi bilan tanishish, ushbu so‘zlarni daftarga yozish. Matn yuzasidan savollar berishga o‘rgatish, shuningdek o‘z javoblarida fikr ifodalashda tartibni bildiruvchi so‘zlar (avval, keyin)dan foydalanishga o‘rgatish. X va h tovushlarini o‘zaro farqlash, ushbu tovushlar ishtirok etgan so‘zlar imlosi ustida ishlash.
Matnda fikrni asoslaydigan gaplarni topish va tahlil qilish.