Ulıwma orta bilim beriw mektepleriniń 7-klası ushın sabaqlıq

Tapsırma 3.1. 
Rásmiy ómirbayannıń qalay jazılıwın úyrengen halda 
ózlerińizdiń ómirbayanıńızdı tolıq, keń hám rásmiy stilde jazıń. 
Ómirbayan – rásmiy hújjet túri. Onı belgilengen tártipte jazıw talap 
etiledi. Biraq kórkem shıǵarmalarda da dóretiwshiler tárepinen 
ózleri yamasa qaharmanları haqqındaǵı maǵlıwmatlardı keń túrde 
kórkem tilde bayanlaw ushıraydı. Bul usıl arqalı kórkem shıǵarmanıń 
kórkemlilik dárejesi artadı. Bul bayanlaw – kórkem ómirbayan bolıp 
esaplanadı. Bunday kórkem ómirbayanlarǵa tómendegi mısallardı 
keltirsek boladı: 
Tapsırma 3.2.
 
Tekstlerdi oqıp, olardı rásmiy ómirbayannan ajıratıp 
úyreniń. Olardıń qanday ózgesheligi bar ekenligin aytıń.
 
Bizler atadan úsh aǵayinli (úy bolıp ketken úsh qızdan keyingi) erte 
jetim qaldıq. Úlkenimiz toǵız jasar, ortanshımız 6 jasar, men eń genjetayı 3 jasar 
edim. Anamız bizlerdi awzına tislegendey álpeshlep adam etti. Ash qılmadı, 
áptada qılmadı. 
Sol jılları, bálkim, hámmeniń de kún kórisi sol taqılette bolsa kerek, bizler 
háptesine bir márte ǵana «bazar sorpa» isher edik. Tek sol bazar kúni ǵana 
gósh asıladı. Qalǵan kúnlerdegi eń baslı awqatımız aǵarǵan qatqan jarma. 
Geyde gósh ala almaǵan bazarda qaq erik salınǵan nan sorpa jeymiz. Bul – biziń 
ushın kishigirim bayram. Qaq erik penen nannıń shiresi shıqqan sorpaǵa iship 
toymaymız. 

---

180
Qorada malımız bar, ketekte tawıǵımız bar. Lekin, olardıń heshqaysısı 
soyılmaydı. Tawıqtı tek qonaq ushın saqlaymız. Qapılǵır qonaq ta kelebermeydi. 
Jesir hayal menen jetim ballardıń úyine ne qonaq keletuǵın edi. Qonaq kelse 
quwanatuǵınımız, tawıq soyıladı, sorpa ishemiz, ustaǵan retinde qanat-panatı 
tiyeǵoyadı. 
Qudayǵa shúkir, biz aǵarǵansız bolmadıq. Anam hár jılı keminde eki sıyır 
sawar edi. Qatıq-sútke «sen ish, men ish» boladı. Iship tawısa almaǵanımızdı 
gúbige pisip ayran etedi, mayın aladı. Tulıp tıǵıp, toraq isleydi. Bunıń ózi 
úlken awqat. Ortasına sarı may quyılǵan qatıbılamıq penen toraq qatqan 
qatıbılamıqtıń mazası ele tańlayımnan ketpeydi. Átteń, búgingi bala-shaǵalar 
sol bılamıqtıń ekewin de durıslap pisire almaydı. Durısıraǵı, pisirgisi kelmeydi. 
 
(M.Nızanov)