Ulıwma orta bilim beriw mektepleriniń 7-klası ushın sabaqlıq

ÓMIRBAYAN QALAY JAZÍLADÍ?
Ómirbayan – belgili bir shaxs tárepinen óziniń jeke ómiri hám iskerligi 
haqqında bayanlanǵan rásmiy hújjet. Ómirbayan birdey úlgige iye emes, 
tolıq yamasa keń túrde jazılıwı múmkin. Ol avtor tárepinen erkin dúziletuǵın 
hújjet. Ol erkin (ıqtıyarlı) dúzilse de, ómirbayanda ayırım bólimlerdiń bolıwı 
shárt. 
Ómirbayan ápiwayı qaǵazǵa, ayırım jaǵdaylarda, yaǵnıy jumısqa, 
oqıwǵa kiriwde arnawlı blankalarda qoldan yamasa kompyuterde jazıladı. 
Tekstti bayan etiw forması gúrriń usılında bolıp, birinshi bette beriledi. 
Barlıq maǵlıwmatlar xronologiyalıq tártipte, anıq sáneler menen 
(imkanı barınsha jılı, ayı, kúni kórsetilgen halda) beriledi. Barlıq sanlar 
arab sanlarında kórsetiledi. Ómirbayan sonday etip dúziliwi kerek, onıń 
menen tanısqan adam avtordıń ómir jolı, iskerligi haqqında anıq túsinikke 
iye bolsın. 
Ómirbayan úlgisi:
3-SABAQ

---

179
ÓMIRBAYAN
Men, Qıdırbaev Azamat Qurbanbaevich, 1984-jıl 4-noyabrde Nókis 
rayonında xızmetker shańaraǵında tuwıldım. 
Ózbekstan Respublikası puqarasıman.
Milletim – qaraqalpaq.
Ákem – Nurımbetov Qurbanbay Qıdırbaevich Nókis rayonı №3-mektepte 
oqıtıwshı, anam – Rısjanova Gúlayım Esimbetovna Nókis rayonı 
№1-poliklinikasında miyirbiyke bolıp isleydi. 
1991-jıldan 2002-jılǵa shekem Nókis rayonındaǵı №3-mektepte oqıp 
pitkerdim. 2002-jılı Berdaq atındaǵı qaraqalpaq mámleketlik universitetiniń 
qaraqalpaq filologiyası fakultetine oqıwǵa kirdim. 2006-jılı usı universitetti 
tamamlap, qaraqalpaq tili hám ádebiyatı páni oqıtıwshısı sıpatında jollama 
tiykarında Nókis rayonı №10-mektepke jumısqa jiberildim. 
2010-jılı xalıq bilimlendiriw tarawında erisken nátiyjelerim ushın 
Qaraqalpaqstan Respublikası xalıq bilimlendiriw aǵlası kókirek nıshanı menen 
sıylıqlandım. 
2012-jıldan baslap Xalıq demokratiyalıq partiyasınıń aǵzasıman.
Shańaraqlıman. 
Meniń mákan jayım: Nókis rayonı, Berdaq kóshesi, 12-úy. 
Tel.:
__________
(qolı) A.Qıdırbaev
2021-jıl 24-fevral