Ulıwma orta bilim beriw mektepleriniń 7-klası ushın sabaqlıq

Tómendegi súwretler tiykarında «Turizm hám onıń 
áhmiyeti» degen temada kishi kólemli tekst jazıń. 
3-SABAQ
Tekstti jazıw shártleri:
1. Tekstte súwretlerdegi izbe-izlik saqlanıwı kerek. 
2. Xostel, úy miymanxanası, miymanxana bir-biri menen salıstırılıwı kerek. 
Salıstırıwda baslawısh hám bayanlawıshtıń arasına sızıqsha qoyılıw qaǵıydalarınan 
paydalanılıwı kerek. 

---

157
3. Aeroportlardıń áhmiyetin bayanlawshı gáplerde baslawısh penen 
bayanlawısh orın tártibi arqalı baylanısıwı kerek. 
4. Turizmniń rawajlanıwınıń sebebi hám turizm tiykarında payda bolǵan gid 
kásibi haqqındaǵı pikirlerińiz baslawısh penen bayanlawıshtıń kelisiw usılı arqalı 
bildiriliwi kerek.
Tapsırma 3.2. 
Tómendegi teksttegi gáplerden qospa bayanlawıshlardı 
tabıń. Olardıń baslawısh penen baylanıs usılın tabıń. 
Aqshakól Topıraqqala menen Qızılqalanıń qublasında jaylasqan. Eki arası 
shama menen 6-7 shaqırım. Bunnan kóp jıllar burın Topıraqqalanıń qasındaǵı 
Qızılqalanı saldırǵan Aqshaxan degen bolǵan. Burın Ámiwdáryanıń suwı usı qalanıń 
ústinen aǵadı eken. Kól de sol dáryadan aǵıp tolıp turǵan. Biraq Aqshaxan ótip 
ketkennen keyin bul suwlar tartılıp, kól shólistanlıqqa aylanǵan. 
Órde, «Túyemoyın» tárepinde Sultan-Súyin degen patsha bolıp, ol házirgi 
Xojelidegi Nazlımxan sulıwǵa ashıq boladı. Qız oǵan razı bolmaydı. Niyeti ámelge 
aspaǵan patsha bul jerdiń xalqın qırıp taslaw maqsetinde dáryanı «Túyemoyın»nan 
baylatqan. Suwsızlıqtan xalıq qıynalıp, kóshe baslaydı. Nazlımxan sulıw Sultan-
Súyinge dáryanı ashsa onıń usınısına razı bolatuǵınlıǵın aytadı. Biraq ol jigirma 
qulınlı biyeni qulınınan ayırıp, jolǵa, jigirma jerge baylaydı. Sultan-Súyin dáryanıń 
saǵasın qullarına ashqızǵan waqıtta, qız atqa minip qasha baslaydı. Qulını qalǵan 
biye qulınına jetiw ushın shaba beredi. Qulınına jetken biyeni qaldırıp, ekinshi 
biyeni, onnan soń úshinshi biyeni minip, qashıp qutılıwǵa erisedi. Patsha hayaldan 
aldanǵanına arlanıp, áskerleri menen bul jerdi tárk etedi hám tawǵa ketip, úńgirde 
jasay baslaydı. Bul úńgir házirge deyin bar eken.
Aradan kóp waqıtlar ótip, Aqshaxankól Estemes degen bay tárepten iyelenip, 
oǵan «Estemeskól» degen at ta berilgen. Waqıttıń ótiwi menen kól qurıydı hám 
ornına torańǵıllar shıǵadı. Ol endi «Torańǵılsay» dep atala baslaydı. «Torańǵılsay»ǵa 
jáne suw kelip, jáne náwpir suwlı kól boladı hám «Aqshakól» dep ataladı.