У. В.Ғафуров, Ш. И. Мустафақулов, М. Ш. Бўтабоев “Ўзбекистоннинг ижтимоий-иқтисодий ривожланиш стратегияси” фанининг ЎҚув-услубий мажмуаси

ИНВЕСТИЦИЯ МУҲИТИ – бу мамлакатдаги инвестиция жараёнларига таъсир кўрсатувчи иқтисодий, сиёсий, меъёрий-ҳуқуқий, ижтимоий ва бошқа шарт-шароитлар мажмуи.
ИНВЕСТИЦИЯ НОРМАСИ – инвестициялар ҳажмининг ялпи ички маҳсулотга бўлган нисбати.
ИНВЕСТИЦИЯ СИЁСАТИ – инвестиция фаолиятини жонлан­ти­риш, иқтисодиётни юксалтириш, ишлаб чиқариш самарадор­лигини ошириш ва ижтимоий муаммоларни ҳал қилиш мақ­садида иқтисодий субъектлар учун қулай хўжалик юритиш шароитларини яратишга қаратилган мақсадли тадбирлар маж­муи.
ИНВЕСТИЦИЯВИЙ ФАОЛЛИК – турли иқтисодий субъектлар (давлат, корхона ва ташкилотлар, жамғармалар ва ҳ.к.)нинг даромад олиш мақсадида миллий ёки хорижий иқтисодиётларга инвестиция ресурсларини киритишга интилиши.
ИНВЕСТИЦИЯВИЙ ҲАМКОРЛИК– халқаро иқтисодий муносабатларнинг бир кўриниши бўлиб, ресурсларни рационал тақсимлаш, халқаро меҳнат тақсимотида иштирок этиш натижасидаги устунликларидан фойдаланиш орқали давлат томонидан иқтисодиётда нисбатан юқори натижаларга эришиш, технологик ишлаб чиқариш тузилмасини янгилаш каби натижаларни мақсад қилган.
ИНВЕСТИЦИЯЛАШ – бу асосий фондларни такрор ишлаб чиқариш хамда келгусида фойда олиш мақсадида иқтисодий ресурсларни узоқ муддатга киритиш деган таърифдан келиб чиқсак, табиийки, ресурларни киритишнинг асосий жихати хусусий маблағлар ва инвесторларнинг қарз маблағларини янги қийматни хосил қиладиган ишлаб чиқариш активларига айлантиришдан иборат.
ИНВЕСТОР – хусусий ва қарзга олинган мулкий ва интеллектуал қийматларни сарфлаш ҳақида қарор қабул қилувчи инвестиция фаолияти субъекти. Инвесторлар– хусусий ва қарзга олинган мулкий ва интеллектуал қийматларни сарфлаш ҳақида қарор қабул қилувчи инвестиция фаолияти субъектлари. Инвесторлар объектлар ва инвестиция натижаларига эгалик қилиш, фойдаланиш ва тасарруф қилиш ҳуқуқига эга бўлади. Инвесторлар кредитор ва харидор ролини бажаришлари, шунингдек, инвестиция фаолиятининг бошқа иштирокчилари функцияларини бажариши мумкин. Одатда инвесторлар капитал қўйилмалар сарфланадиган соҳаларни аниқлайди, шартнома шартларини ишлаб чиқади ва инвестиция актининг бошқа субъектлари билан - контрактор, ҳукумат органлари, якуний маҳсулот ишлаб чиқарувчилар ва шу маҳсулотнинг истеъмолчилари билан ҳисоб-китобларни амалга оширади.