Turizm va mehmonxona xo’jaligi” kafedrasi o’zbekiston iqtisodiyoti fani bo’yichA

Quyi Amudaryo iqtisodiy rayoni O‘zbekistonning shimoli-g‘arbida, Amudaryoning quyi qismida joylashgan bo‘lib, u o‘z tarkibiga Qoraqalpog‘iston Respublikasi va Xorazm viloyatini oladi. Mintaqa hududi respublika maydonining 38,3 foizini egallab, u 171,2 ming kv. km. ni tashkil etadi. 2017-yil boshida mintaqada 3594,2 mingdan ziyod kishi istiqomat qildi. Bu – mamlakat aholisining 11,2 foiziga to‘g‘ri keldi.

Quyi Amudaryo iqtisodiy rayoni qadimiy sug‘orma dehqonchilik mintaqasida joylashgan. Rayonda, ayniqsa, Ustyurtda 200 dan ortiq foydali qazilmalar konlari (tabiiy gaz, temir rudasi, fosforitlar, osh tuzi va boshqalar) topilgan. Bu hududda paxtachilik bilan bir qatorda sholichilik, polizchilik, urug‘lik beda, sabzavotchilik rivojlandi. Boy mineral xomashyo resurslaridan kompleks foydalanish asosida yaqin istiqbolda ikki sanoat rayoni va bir qator sanoat bog‘lamlari paydo bo‘ladi. Orol dengizining qurib borishi va Orolbo‘yining sahroga aylanishi jarayonlari bilan bog‘liq holda vujudga kelgan murakkab ijtimoiy-iqtisodiy vaziyat hududni rivojlantirish istiqbollarini qo‘shni Turkmanistonning Toshhovuz viloyati bilan muvofiqlashtirilgan holda hal etishni talab etadi.

2016-yilda mintaqa O‘zbekistonda ishlab chiqarilgan YIM hajmining 6,9 foizini, sanoat mahsuloti hajmining 6,3 foizini, yalpi qishloq xo‘jaligi mahsulotlarining 8,8 foizini, asosiy kapitalga kiritilgan investitsiyalarning 10,4 foizini, qurilish ishlarining 8,1 foizini yaratdi. Shuningdek, mintaqaga respublika tashqi savdo aylanmasining 2,2 foizi, iqtisodiyotda band bo‘lganlarning 10,1 foizi, chakana savdo aylanmasi hajmining 7,1 foizi to‘g‘ri keldi.