Turizm va mehmonxona xo’jaligi” kafedrasi o’zbekiston iqtisodiyoti fani bo’yichA

Havo transporti. 1992-yilda tashkil topgan «O‘zbekiston havo yo‘llari» milliy aviakompaniyasi havo transporti sohasini boshqaruvchi asosiy tuzilma hisoblanadi. «O‘zbekiston havo yo‘llari» milliy aviakompaniyasi MDH mamlakatlari ichida salohiyati jihatidan 3 o‘rinda turadi. O‘zbekistonda 8 ta xalqaro aeroport mavjud. Toshkent, Samarqand, Urganch, Termiz va Buxoro aeroportlari jahon talablarida modernizatsiya qilingan. Mahalliy yo‘lovchilarga xizmat ko‘rsatuvchi Toshkent-3 aeroporti faoliyat ko‘rsatmoqda. Bu aeroportlarda jahon standartlariga javob beradigan aeronavigatsiya qurilmalari keltirib o‘rnatildi.

2016-yilda havo yo‘llari orqali qariyb 2,1 million yo‘lovchi, 26,5 ming tonnadan oshiq yuk tashildi. Milliy aviakompaniya tasarrufida hozirda bir necha o‘nlab zamonaviy avialaynerlar mavjud, Airbus, Boing, RJ85 kabilar shular jumlasidandir.

Hozirgi kunda «O‘zbekiston havo yo‘llari» milliy aviakompaniyasi 20 dan ortiq mamlakatning 45 dan ortiq aeroportiga muntazam parvozlarni amalga oshirib kelmoqda.

«O‘zbekiston havo yo‘llari» milliy aviakompaniyasi tarkibida uchuvchilar, bort kuzatuvchilari va aviatsiya sohasining boshqa tarmoqlari uchun mutaxassislar tayyorlash va malakasini oshirish O‘quv-mashq markazi faoliyat ko‘rsatib kelmoqda. Navoiy aeroporti hududida erkin industrial-iqtisodiy hudud va xalqaro intermodal logistika markazi barpo etilgan.