Туйғусини шакллантиришдан бошланади. Миллий ўзликни англаш истиқлол сари ҳамжиҳатлик, комил ишонч билан боришдир

Миллий онг - шундай ғоялар, фикрлар тизимики, у ҳар бир миллатнинг тарихи, тақдири ва келажаги билан боғлиқ бўлган манфаатлар, мақсадларни ифодалаш билан бирга, миллат вакиллари фаолиятини мақсад, йўналишлар томон бошқариб туради.
Миллий онг юқори бўлиб, у тараққиёт жараёнида фаоллашиб борган тақдирдагина ўз натижасини беради. Миллий онг миллий манфаатлар сифатида, моддий ва маънавий бойликларни ишлаб чиқариш, ўзга миллатлар билан ўзаро муносабатлар жараёнида ҳам шаклланиб, ривожланиб боради.
Мана шу жараёндагина миллатга хос бўлган хусусиятлар шаклланади ва бундай хусусиятлар миллатни бошқа миллатлардан ажратиб туради.
Миллий онгнинг таъсирида шаклланган бундай хусусиятлар миллий манфаатлар ва мақсадларни шаклланишида етакчи омил вазифасини бажаради.
Қарамлик йилларида кўплаб миллатларнинг миллий онгини юксалтирмасликка катта эътибор қаратилган эди. Мамлакатимиз ўз мустақиллигини қўлга киритганидан сўнг миллий онгни ривожлантириш учун катта имкониятлар яратиб берилмоқда.
Оммавий ахборот воситаларида миллий ғурур, миллий фахр, миллий ифтихор тушунчалари кенг қўлланилиб, улар асосан, бир маънода ишлатилмоқда, яъни, миллий ифтихор (фахр) бу - миллий ғурурдир.
Миллий ғурур - шахс, ижтимоий гуруҳнинг миллий ўз-ўзини англаши асосида шаклланадиган, аждодлари қолдирган моддий, маънавий меросдан, ўз халқининг жаҳон тсивилизатсиясига қўшган ҳиссаси, ўша, миллатлар олдидаги қадр-қиммати, обрў-эътиборидан фахрланиш ҳиссини ифодаловчи тушунча.
Миллий ғурур - шахс ғурури - бу фахрдир. Ҳар бир шахс ўз ютуқларидан мамнуният ҳиссини туяди, ота-она фарзандларидан, устоз истеъдодли шогирдидан, ёзувчи яхши асаридан, боғбон сўлим боғидан фахрланади ва ҳоказо. Ўзлигича қола билган одамнинг ғурури - бу бутундир.
Миллий ғурур ҳар бир миллат ҳаётидаги мавжуд моддий ва маънавий асосларда, объектив ва субъектив омиллар таъсирида, индивидуал ва ижтимоий даражаларда шаклланиб, ривожланиб, ўзига хос шакл-кўринишларда намоён бўлувчи ижтимоий, руҳий-маънавий ҳодисадир.
Миллий ғурур қуйидаги шаклларда намоён бўлади: миллатнинг ютуқлари, обрўй-эътибори билан фахрланиш, унинг муаммоларига бефарқ қараб турмаслик; ўз элига, миллатига жонкуяр бўлиш; ўз миллатининг моддий, маънавий меросини асраб - авайлаш; халқ одатлари, анъаналари, қадриятларини ҳурмат қилиш, уларни бойитиш ва такомиллаштириш; ўз миллатига меҳр-муҳаббатини амалий фаолиятда намоён қилиш.
Соғлом миллий ғурур ўзга миллатга мансуб кишиларга ҳурмат-эҳтиром кўрсатишни тақозо қилади. Бошқа миллат вакилларининг иззат ва ғурурини камситмайди. Мустақиллик кишилар миллий ғурурини ошириб, уни халқ, Ватан, аждодлар хотираси олдидаги масъулиятини ҳис қилишдек, мазмун билан бойитилмоқда.