Toshkent tibbiyot akademiyasi tibbiy pedagogika fakulteti

Sobiq Sovet psixologiyasida psixik rivojlanish bosqichlarining xarakteristikasi

Sobiq Sovet psixologiyasida shaxsning psixik rivojlanishi muammosi L.S.Vigotskiy, P.P.Blonskiy, S.L.Rubinshteyn, A.N.Leontev, B.G.Ananev, L.I.Bojovich singari yirik psixologlarning asarlarida o‘z aksini topgan. Keyinchalik ushbu masala bilan shug‘ullanuvchilar safi kengayib bordi. Xuddi shu boisdan shaxsning tuzilishi, ilmiy manbai, rivojlanishining o‘ziga xosligi bo‘yicha yondoshuvlar, muayyan darajada tafovutlarga ega. Hozirgi davrda shaxsning rivojlanishi yuzasidan mulohaza yuritilganda olimlarning ilmiy qarashlarini muayyan guruhga ajratish va undan so‘ng ularning mohiyatini ochish maqsadga muvofiqdir. Bizningcha, ontogenezda shaxs taraqqiyotini bir necha bosqichlarga ajratish va ularning har biriga alohida ilmiy psixologik ta’rif berish nuqtai nazaridan yondoshish quyidagi nazariya va yo‘nalishlarni tashkil qiladi. Jumladan, rivojlanishdagi inqirozga binoan (L.S.Vigotskiy), motivatsion yondoshish (L.I.Bojovich), faoliyatga ko‘ra munosabat (D.B.Elkonin), shaxsning ijtimoiylashuvi xususiyatiga e’tiboran (A.V.Petrovskiy), shaxsni tutgan pozitsiyasini hisobga olib (D.I.Feldshteyn) va hokazo.