Тошкент – 2016 Тожиев М

4-§. Ўқув машғулотларни лойиҳалаб ўқитишнинг методикаси

Ахборотлар оқимининг жадал суратлар билан ошиб бориши ва тез эскириши, илм-фан, техника ва ишлаб чиқариш соҳаларида рўй бераётган илмий янгиликларнинг сон ва сифат жиҳатидан кескин ўсиб бориши бугунги кун таълим олувчиларига улар тўғрисида ўз вақтида кенг маълумотлар бериб бормасдан туриб таълим мақсадларига эришиш қийин кечмоқда. Бу муаммони ҳал этишда таълим жараёнининг ўқув манбалари ҳисобланган ўқув дастури, ўқув режаси, дарслик, ўқув қўлланмалар савияси ва ўқитувчининг касбий назарий-амалий тайёргарлик даражаси ҳамда уларнинг касбий маҳоратига бевосита боғлиқдир.

Таълим жараёнида инновацион-педагогик технологияни қўллашдан кўзланган асосий мақсад:
ўқув дастури мазмунининг мукаммаллиги;
дарслик ва ўқув қўлланмаларнинг замонавий талаблар асосида яратилганлиги;
ўқув режаси моҳиятининг назарий ва амалий хусусиятларига кўра ягона мақсадга эришиш учун хизмат қилиши;
машғулотларни самарали ташкил этиш имконини берувчи педагогик шарт-шароитларнинг мавжудлиги;
ўқитувчи ҳамда таълим олувчилар ўртасида ижобий, самимий муносабатларнинг қарор топиши;
таълимий жараённи олдиндан режалаштириш ва шу асосида лойиҳалаш;
таълим олувчилар томонидан ўзлаштириладиган назарий ва амалий билимлар, кўникма ва малакалар даражасини ташхис қилиш ҳамда таълим мақсадларига эришишни кафолатлашни олдиндан башорат қила олишдан иборатдир.
Шундай экан, ҳозирги кунда биринчи навбатда ҳар бир дарс машғулоти жараёни олдиндан режалаштирилиши ва лойиҳаланиши талаб этилади. Дарс машғулотини лойиҳалашни қуйидаги босқичларда амалга ошириш мақсадга мувофиқ ҳисобланади:
1-босқич. Қаралаётган ўқув предметининг ўқув дастури билан танишиб чиққан ҳолда:
ўқув дастурида келтирилган мавзулар билан танишиб чиқиш;
шу асосда тавқимий-мавзу режани тузиш;
ҳар бир мавзунининг мазмунига доир манбаларни ўрганиш, шу асосда материаллар йиғиш;
ҳар бир ўрганилиши керак бўлган мавзунинг моҳияти билан танишиб чиқиш ва булар мавзуларда илгари сурилган ғояларни умумлаштириш ҳамда яхлитлашдан иборат.
Булар ўқитувчи томонидан таълим жараёнида ўрганилаётган ҳар бир мавзу бўйича таълимнинг умумий жараёнини тасаввур этиш имконини беради ва пировардида таълим олувчиларга етарли даражада маълумотларни беришга эришади.