Texnologiya fanini o‘qitishda pedagogik texnologiyalar

O‘quv fanining maqsadi va vazifalari
Fanni o‘qitishdan maqsad – talabalarga “Texnologiya” fani bo‘yicha ta’lim jarayonida interfaol metodlar, innovatsion pedagogik texnologiyalarni, axborot texnologiyalarini qo‘llashni, noan’anaviy darslarga tayyorgarlik ko‘rishni, darsning texnologik xaritasini tuzishni, mavzuga mos pedagogik texnologiyalarni tanlash, zamonaviy pedagogik texnologiyalar va ulardan o‘quv-tarbiya jarayonida foydalanishni o‘rgatishdan iborat.
Fanning vazifasi – umumiy o‘rta ta’lim maktablarida o‘qitiladigan “Texnologiya” fani darslarida innovasion ta’lim texnologiyalari qo‘llanilishini tadqiq etish, shu ishlarni amalga oshirish va yanada takomillashtirish bo‘yicha zarur ko‘rsatmalar va uslubiy tavsiyalarni ishlab chiqishdan iborat.
Shunday qilib, “Texnologiya fanini o‘qitishda innovatsion pedago-gik texnologiyalar” o‘quv fanining maqsad va vazifalari quyidagilardan iborat:
– bo‘lajak “Texnologiya” fani o‘qituvchilarini zamonaviy ta’lim texnologiyalarining nazariy asoslari bilan qurollantirish;
– yaxlit pedagogik jarayonda ta’lim-tarbiya ishlarini samarali tashkil etishga qaratilgan innovatsion pedagogik texnologiyalardan foydalanish uchun zarur ko‘nikmalarga ega bo‘lishlarini ta’minlash;
– zamonaviy ta’lim texnologiyalaridan, innovatsion g‘oyalardan o‘z faniga oid mavzularni o‘tishda foydalana olish, moslashtirish mahoratini shakllantirish;
– pedagogik faoliyatni ijodiy va metodik to‘g‘ri rejalashtirishga tayyorlikni shakllantirish;
– mustaqil ishlash, mustaqil bilim olish, o‘zini tarbiyalash va o‘zining mutaxassislik darajasini doimiy ravishda oshirib borishga intilishni faollashtirish.
Mazkur o‘quv fani ma’ruza va amaliy mashg‘ulotlardan iborat. Bunda talabalarga pedagogika, pedagogik mahorat, pedagogik texnika, “Texnologiya” fanini o‘qitish metodikasi kabi fanlardan nazariy va amaliy mashg‘ulotlarda ta’lim texnologiyalaridan foydalanish bo‘yicha umumiy holda berilgan tushunchalar yanada kengaytiriladi, to‘ldiriladi, mustahkamlanadi va xususiy holga keltiriladi.
Bulardan ko‘rinadiki, mazkur o‘quv fani o‘qitilishi orqali talaba-larni, ya’ni bo‘lajak “Texnologiya” fani o‘qituvchilarini “Texnologiya” fani darslarida yangi pedagogik va axborot texnologiyalarini qo‘llashga, mavjud ta’lim texnologiyalarini texnologik ta’limga moslashtirishga, shuningdek, yangi ta’lim texnologiyalarini yaratishga o‘rgatiladi, kelgusida ularda texnologik ta’lim darslarini mustaqil va ijodiy tashkil etishga oid bilim va ko‘nikmalarni shakllantirishga erishiladi.