«Texnologik ta’lim» kafedrasi " Standartlashtirish, metrologiya, va sertifikatsiya"

24-modda. Tovar belgisiga doir guvohnomani yoki tovar kelib chiqqan joy nomidan foydalanish huquqi to'g'risidagi guvohnomani haqiqiy emas deb topish
Tovar belgisiga doir guvohnoma uning butun amal qilish muddati davomida, basharti u ushbu Qonunning 4-moddasi ikkinchi qismida va 10-moddasi birinchi qismining 1 - 12-bandlarida belgilangan talablarni buzgan holda berilgan bo'lsa yoki tovar belgisini ro'yxatdan o'tkazish to'g'risidagi ma'lumotlar rasmiy axborotnomada e'lon qilingan sanadan e'tiboran besh yil mobaynida, basharti u ushbu Qonunning 10-moddasi birinchi qismining 13 va 14-bandlarida belgilangan talablarni buzgan holda berilgan bo'lsa, to'liq yoki qisman haqiqiy emas deb topilishi mumkin.
Tovar kelib chiqqan joy nomidan foydalanish huquqi to'g'risidagi guvohnoma uning amal qilishining butun muddati davomida, basharti u ushbu Qonunda belgilangan talablarni buzgan holda berilgan bo'lsa, haqiqiy emas deb topilishi mumkin.
25-modda. Tovar kelib chiqqan joy nomi ro'yxatdan o'tkazilganligining bekor qilinishi, tovar belgisiga doir guvohnoma yoki tovar kelib chiqqan joy nomidan foydalanish huquqi to'g'risidagi guvohnoma amal qilishining tugatilishi
Tovar kelib chiqqan joy nomi ro'yxatdan o'tkazilganligi quyidagi hollarda bekor qilinadi:
mazkur jo'g'rofiy obyekt uchun xos bo'lgan sharoitlar yo'qolganda va reyestrda ko'rsatilgan xususiyatlarga ega bo'lgan tovar ishlab chiqarishning iloji bo'lmaganda;
chet ellik yuridik yoki jismoniy shaxslar tovar kelib chiqqan mamlakatda tovar kelib chiqqan shu joy nomiga doir huquqlarini yo'qotganda.
Tovar belgisiga doir guvohnomaning yoki tovar kelib chiqqan joy nomidan foydalanish huquqi to'g'risidagi guvohnomaning amal qilishi uning amal qilish muddati tugaganligi munosabati bilan tugatiladi.
26-modda. Tovar belgisiga doir mutlaq huquq
Tovar belgisining egasi tovar belgisidan foydalanish va uni tasarruf etish mutlaq huquqiga ega.
Tovar belgisiga doir mutlaq huquq guvohnomada ko'rsatilgan tovarlarga nisbatan amal qiladi va Patent idorasining rasmiy axborotnomasida e'lon qilingan sanadan e'tiboran ro'yxatdan o'tkazishning amal qilishi davri mobaynida amalga oshiriladi.