Termiz davlat universiteti tabiiy fanlar fakulteti geografiya kafedrasi

Ўзбекистон — Исроил муносабатлари. Исроил Ўзбекистон Республикаси суверенитетини 1991 йил 25 декабрда тан олди ва 1992 йилда дипломатия муносабатлари ўрнатди. Исроил давлати Ўзбекистон Республика мустақиллигини тан олганидан кейин иккала мамлакат ўртасидаги иқтисодий ва маданий алоқалар учун ҳуқуқий негиз яратишга киришилди. 1994 йилдан инвестицияларни рағбатлантириш ва ўзаро ҳимоя қилиш, ҳаво қатнови, автотранспорт ва сайёҳликни ривожлантириш хусусида битимлар имзоланди. 1997 йилда апрелда Ўзбекистон Республикаси Ташқи ишлар вазирининг Исроилга расмий ташрифи чоғида маданият, фан ва ма-ориф соҳасидаги ҳамкорлик ҳақида битим тузилди. 1998 йилда сентябрь ойида Ўзбекистон Республикасининг биринчи Президенти И. Каримовнинг Исроилга ташрифи давомида ҳамкорликнинг турли жиҳатларига оид 8 та шартнома имзоланди. Ҳукуматлараро ўзбек-исроил савдо-иқтисодий комиссияси иш бошлади. Исроил дастлабки йилларда Ўзбекистондан, асосан, қимматбаҳо тошлар, рўзғор пахтаси, кигиз харид қилган бўлса, кейинчалик уларнинг ёнига пахта толаси ва газлама, кимёвий маҳсулотлар ҳам қўшилди. Ўзбекистон эса ундан механик ва электр асбоб-ускуналар, қора металл, пластмасса ва улардан ясалган буюмлар, оптика аппаратлари, қандолат маҳсулотлари, кофе, чой, гўшт ва балиқ маҳсулотлари, спорт анжомлари, дори дармон, ўйинчоқлар харид қилади. Қишлоқ хўжалиги соҳасида Исроил фирма ва компаниялари б-н ҳамкорлик йўлга қўйилган. Жумладан, 1994 й.дан буён Тошкент вилояти Юқори Чирчиқ туманининг Аҳмад Яссавий номидаги хўжалигида 46 га ерда томчилатиб суғориш усулининг илғор технологияси жорий этилиши сабзавот ва картошка ҳосилдорлигини 3 баравар оширди. Оққўрғон туманидаги «Оққўрғон» хўжалигида қурилган кичик сут заводи 9 хил маҳсулот беради. Ем-хашак цехи ва 2 та хусусий чорвачилик фермаси қуриб ишга туширилди, улар учун зарур асбоб-ускуналар келтирилди. 1998 й. июнида Тошкент вилояти Қибрай туманида сутни қайта ишлаб, турли маҳсулотлар ишлаб чиқрадиган ўзбек-исроил-америка «Турон-97» қўшма корхонаси ишга туширилди. Исроилнинг «Зераим Гедера» ва «Нетафим» компаниялари билан ҳамкорликда Исроил пахта навларини етиштиришга киришилди. Ўзбекистоннинг бир қанча туманларида Исроилнинг «Марав» фирмаси асбоб-ускуналари асосида 15 та кичик сут заводини қуриш ишлари бошлаб юборилди. Уларнинг ҳар бири сменада 1, 1,5, 2 минг литр сутни қайта ишлайди; қурилиш маблағини Исроил банклари беради.