Тема: Анатомия панинин классификациясы рауажланыу тарийхы хам уйрениу методы

Qol súyekleriniń birlesiwi

Iyin beldewi súyekleriniń birlesiwi
Palwan súyek óziniń topır ushı menen tós súyegine birlesip, tós omıraw buwının, jalpaq ushı menen kókirek súyeginiń akramion ósigine birlesip akramion omıraw buwının payda etedi.

Iyin buwını

Iyin buwını iyin súyeginiń bası menen gúrek súyeginiń buwın shuqırı qosılıwınan payda bolǵan. Lekin gúrektiń buwın shuqırı ádewir júze bolǵanı sebepli iyin súyeginiń shar tárizli (domalaq) bası onda jaqsı ornasa almaydı. Usıǵan baylanıslı buwın shuqırınıń átirapında fibroz talshıqlı shemirshekten jasalǵan erin (sheńber) jaylasqan.
Iyin buwını júdá kóp hám kúshli bulshıq etler menen oralǵan. Sonıń ushında bul jerde baylam kóp emes.

Shıǵanaq buwını

Shıǵanaq buwını úsh súyektiń yaǵnıy iyin súyeginiń tómengi (distal) ushı menen bilek hám shıǵanaq súyekleriniń joqarı (proksimal) ushlarınıń birlesiwinen payda bolǵan.

Bilek súyekleriniń óz-ara birlesiwleri

Bilek súyegi menen shıǵanaq súyeginiń bir-birine qaraǵan qırları arasında fibroz toqımasınan dúzilgen perde tartılǵan. Bul perdeniń orta bólimi ádewir qalıń hám júdá bekkem bolıp, eki súyekti bir-birine bekkem birlestirip turadı. Sonday- aq bul perde bilektegi bir qansha bulshıq etlerdiń baslanıw jeri esaplanadı. Bilek hám shıǵanaq súyekleriniń ústingi hám astınǵı (tómengi) ushları óz-ara buwın payda etip qosıladı.

Qol pánjesindegi súyeklerdiń óz-ara hám bilek súyekleri menen

birlesiwi
Eki katar jaylasqan alaqan ústi súyekleriniń birinshi qatarındaǵı úsh súyektiń proksimal tárepindegi buwın júzeleri hám bilek súyeginiń tómengi ushındaǵı keń buwın júzesi arasında payda bolatuǵın buwın, bilek-alaqan buwını dep ataladı. Alaqan súyeginiń birinshi qatarı menen ekinshi qatarı arasındaǵı buwın orta alaqan buwını dep ataladı. Áne usı eki birlespeniń birigiw jeri pánje buwını dep ataladı. Bunnan basqa, alaqan súyekleride bir-biri menen óz-ara birlesken.