Тема: Анатомия панинин классификациясы рауажланыу тарийхы хам уйрениу методы

Kishi (ókpe) vena sheńberi

Kishi (ókpe) vena sheńberine ókpe stvolı menen ókpe venaları kiredi.
Ókpe venaları arteriya qanın alıp kelip júrektiń shep bólmeshesine quyadı. Bul sheńber dáslep ókpe kapillyarlarınan baslanıp, kapillyarlar bir-birine qosılıwı nátiyjesinde barǵan sayın úlkeyip baradı hám ókpe dárwazasına jetip kelgende hár ókpeden ekewden (ulıwma tórtew) úlken vena payda boladı. Tórt venanıń hár biri ǵárezsiz túrde júrektiń shep bólmeshesine quyıladı. Bul venalardıń klapanları bolmaydı.
Kishi sheńber venaları, úlken sheńber venaları menen anastomoz payda
etedi.

Úlken (gewde) vena sheńberi

Úlken sheńber venalarınıń payda bolıwında tómendegi úsh sistema qatnasadı;

1. 
   Júrek diywalınan keletuǵın venalar
   
2. 
   Joqarı gewek vena sisteması
   
3. 
   Tómengi gewek vena sisteması, úlkenligi hám uzınlıǵı jaǵınan qalǵan eki sistemadan parq qıladı.
   

Birinshi sistema júdá kishi bolıp, qandı tek júrek diywallarınan jıynaydı hám júrektiń oń bólmeshesine quyadı. Joqarǵı hám tómengi gewek venalar bolsa, qandı deneniń joqarǵı hám tómengi bólimlerinen jıynaydı hám júrektiń oń bólmeshesine quyadı. Demek joqarǵı gewek vena bas, moyın, qol, kókirekten qan toplaydı. Tómengi gewek vena ayaq, shanaq hám qarın boslıǵındaǵı jup organlar bawırdan hám de qarın diywallarınan qan toplaydı. Lekin qarın boslıǵındaǵı organlar (asqazan, asqazan astı bezi, juwan hám jińishke ishekler, talaq) dan qan alıp shıǵatuǵın venalar tuwrıdan-tuwrı gewek venaǵa emes, al áwele (bawır) dárwaza venasına quyılıp, bawır ishine kiredi, sońınan onnan bawır venası sıpatında shıǵıp, tómengi gewek venaǵa qosıladı. Joqarǵı hám tómengi gewek venalar sisteması bir-biri menen anastomozlar payda etedi.

Dárwaza vena sisteması

Bawırdıń dárwaza venası qarın boslıǵındaǵı (bawırdan basqa) hámme taq aǵzalar, yaǵnıy asqazan astı bezi, talaq, ót qalta, asqazan, jińishke ishek, juwan ishek hám tuwrı ishek joqarǵı bóliminiń venaları jıynalıwınan payda boladı. Solay etip, joqarıda atı atap ótilgen organlardan jıynalǵan qan tómengi gewek venaǵa qosılıwdan aldın dárwaza venası arqalı bawırǵa kirip onda organizm ushın záhárli zatlardan tazalanıp, (filtrlenip) basqa vena sistemasına yaǵnıy bawır venasına ótedi. Bawır venası tómengi gewek venaǵa quyıladı.
Dárwaza venası tómengi gewek venanıń aldınǵı tárepinde jaylasqan bolıp, uzınlıǵı 3-5 sm, eni 15-20 mm átirapında.
Dárwaza venasın payda etiwde úlken úsh tamır (vena) qatnasadı.
1. Ishek tutqıshtıń joqarǵı venası, 2. Talaq venası, 3. Ishek tutqıshınıń tómengi venası.