Tarix 6-sinf 1-bilet

1. Apennin yarimorolida iqlim iliq bo`lib, yil bo`yi yomg`ir ham bir maromda yog`ar edi. Italiyada qurg`oqchilik ham, qattiq sovuq ham bo`lmasdi. Yegulik mahsulotlar mo`1-ko`lligi va tuproq unumdorligi tufayli ko`p asrlar davomida Qadimgi Italiya aholisining asosiy mashg`uloti dehqonchilik va chorvachilik bo`lgan. Tog`lar mamlakat o`lkalarini bir-biridan ajratmas, shuning uchun ham Italiyada joylashgan turli-tuman qabilalar birga yashashar edi.

«Italiya» so`zining o`zi esa yunonchadan «buzoqchalar o`lkasi» tarzida tarjima qilinadi. Koloniya qurgan yunonlar bu mamlakatda sigirlarni o`tlatish uchun ajoyib o`tloqlarni birinchi bo`lib topgan edilar.

Apennin yarimorolining eng yirik oqar suv manbayi Po daryosidir. Apennin yarimorolining barcha qabilalari italiylar deb nomlangan. Ular orasida lotiniylar, samniylar va sabiniylar ko`pchilikni tashkil etgan. Kelib chiqishi bobida ular yunonlarga yaqin qarindosh bo`lishgan. Italiyaning g`arbiy qismida Kichik Osiyodan bu mamlakatga kelgan etrusklar yashagan. Ularning asosiy mashg`uloti dehqonchilik bo`lgan. Miloddan avvalgi VIII asrga kelib ular Italiyada 12 ta shahar-davlat tuzishadi.Miloddan avvalgi VII asrda Sharq mamlakatlari bilan erkin savdo-sotiq qilish uchun yunon koloniyalari bilan kurash boshladilar. Karfagen mamlakati ham ularga qo`shildi. Avvaliga karfagenlar va etrusklar g`alaba qozonishdi, ammo ko`p o`tmay yunon qo`shinlari ularni quruqlik va dengizda tor-mor qiladi. Shu taxlit,Italiya hududida mavjud bo`lgan etrusk sivilizatsiyasi zavolga yuz tutdi, ammo uning ko`plab yutuqlariga Rim aholisi munosib voris bo`ldi.