Таълим тизимида виртуал назорат тизимининг математик модели ва дастурий таъминоти

* Guliston davlat universiteti axborotnomasi, 2014. № 2 *

УДК 681.3.06:012.44
ТАЪЛИМ ТИЗИМИда виртуал назорат тизимининг математик
модели ва дастурий таъминоти
Д.Э.Тоштемиров, М.Б.Ниёзов, А.Худойбердиев, А.Танибердиев
Гулистон давлат университети
E-mail: [e-mail]
Таълим тизимида ахборот-коммуникация технологияларининг қўлланилиши натижасида ўқув жараёни янгича таълим воситалари билан таъминланади ва ўқув жараёнининг сифати ҳамда самарадорлиги оширилишига эришилади. Ўқув жараёнига ахборот-коммуникация технологияларининг жорий қилиниши натижасида таълим тизими қатнашчилари виртуал олам орқали бир-бири билан мулоқот қилади. Ўқув жараёнини виртуаллаштиришда асосий масала виртуаллаштиришнинг математик моделлари ва дастурий таъминотини ишлаб чиқишдан иборат. Таълим тизимидаги барча электрон ўқув ресурслар, жумладан электрон дарсликлар, электрон қўлланмалар, виртуал лаборатория ва амалий машғулотлари, тақдимот материаллари, виртуал стендлар, виртуал тест назорат тизимлари ўқув жараёнини виртуаллаштиришнинг асосий ташкил этувчилари ҳисобланади. Ўқув жараёнида виртуал тест назорат тизимларидан фойдаланиш алоҳида аҳамият касб этади. Шунинг учун виртуал тест назорат тизимларининг оптимал вариантларини ишлаб чиқиш, яъни уларнинг математик модели ва дастурий таъминотини яратиш муҳим тадқиқотлардан ҳисобланади.
Виртуал тест назорат тизимлари виртуал ўқув жараёнининг ажралмас қисми бўлиб, у таълим олувчиларнинг маълум босқичда олган билимларини объектив баҳолаш, унинг таҳлили натижалари бўйича таълим берувчи учун тегишли тавсиялар тақдим этиш имконини беради.
Виртуал тест-назорат тизимини ишлаб чиқишда тест ва топшириқларнинг қийинлик даражасини баҳолаш, фанларни ўқитиш босқичларига мослаштириш, ҳар бир баҳонинг ахборот ўлчовини динамик ҳолатда аниқланиши баҳолаш натижаларини объективлигини таъминлайди. Бу ҳолат виртуал тест-назорат тизимининг архитектураси, фаолият қонунлари, қўлланиш сценарийларини фундаментал усуллар таснифларни аниқлаш назарияси, эксперт тизимлар, математик ва компьютерли моделлаштириш ва оптималлаш усулларидан фойдаланиш орқали амалга оширилади (Раджабов, Хидирова, 2009).