Talabalarning kasb ta’limi

Didaktik sharoitlar. Agar o’qitish jarayonini samarador amalga oshirishni ta’minlaydigan tashkiliy, moddiy va psixologik sharoitlar yaratilmasa, bu jarayon amalga oshmasligi mumkin. Tashkiliy sharoitlar - bu o’qitish rejimlari va vaqt chegaralari, o’quv jarayonining tashkiliy strukturasi, uning fazoviy tashkiloti (o’quvchilarning o’quv auditoriyalarida joylashuvi va h.k.). Tashkiliy sharoitlar faqatgina o’quv jarayoniga qo’yiladigan talablar (o’quv reja, dars jadvali) bilan emas, balki umumgigienik talablar, o’quvchilarning fiziologik xususiyatlari va ehtiyojlari (turli xildagi faoliyat turlarining almashuvi, ovqatlanish tartibi, eng katta ish qobiliyati vaqti, talabalarning ortiqcha zuriqishiga yo’l qo’ymaslik va h.k.) bilan ham aniqlanadi. Moddiy sharoitlar o’quv jarayonini o’qitish vositalari bilan ta’minlanganligi bilan bog’liq: o’quv jarayonining texnik ta’minlanganligi, ko’rgazmali qurollarning bo’lishi, pedagogning o’quv-metodik kompleksi, talabalarning mustaqil ishini tashkil qilish uchun qullanma va ishlanmalar. Psixologik sharoitlar o’quv jarayonida kommunikativlikni ta’minlash va pedagogning muloqotni boshqara olish qobiliyati bilan hamda o’qitish jarayonida qulay psixologik muhitni ta’minlab beradigan guruhdagi kommunikativ munosabatlarni tashkil qilish bilan bog’liq.