Tadbirkorlik asoslari sohasi

Muloqotga kirishish va aloqa o‘rnatish. Sotishning dastlabki bosqichi bo‘lgan bu jarayon ayni paytda uning natijasini ham belgilab beradi. Siz xaridor bilan muloqotga kirishar ekansiz, eng avvalo, uning ishonchini qozonishingiz zarur. Xaridor sizning so‘zlaringizdan har qanday holda ham o‘z tovarini sotmoqchi bo‘lgan kishini emas, balki o‘z xohish-istagini to‘liq tushunishga harakat qilayotgan hamkorni tasavvur etishi lozim. Aks holda, bu bosqichning ikkinchi qismi – aloqa o‘rnatish amalga oshmaydi. To‘g‘ri, ehtimol xaridor sizning tovaringizni sotib olar, biroq u sizning doimiy mijozingiz va hamkoringizga aylanmay qolishi mumkin.

Suning uchun xaridorni tinglash va ehtiyojni aniqlash muhim hisoblanadi. Siz xaridorning o‘z istaklarini to‘liq ifodalashiga imkon bering va uni diqqat bilan tinglayotganingizga ishontiring. Balki xaridor o‘z ehtiyojini yetarli darajada ifodalay olmas. Siz uning ehtiyojini to‘g‘ri aniqlashga harakat qiling.

Xaridor ehtiyoji aniqlangandan keyingi bosqich – unga tovarni namoyish etish va dalillar keltirish hisoblanadi. Chunki xaridorda haqiqatan ham o‘z ehtiyojidagi tovar namoyish etilganiga shubha bo‘lishi mumkin. Bu boradagi dalillar xaridorni har qanday holatda ham to‘g‘ri tovar tanlanganiga ishontirishga emas, balki tovarni uning ehtiyojiga mos ekanligini ifodalovchi qo‘shimcha ma’lumotlar keltirishga xizmat qilishi lozim.

Xaridor tomonidan e’tiroz bildirilishiga imkoniyat yaratish zarur. Bu boradagi to‘g‘ri yo‘l – e’tirozga javob qaytarish hisoblanadi. Biroq javob xaridorning tovar borasidagi shubha va e’tiborsizligiga asosli hamda haqqoniy bo‘lishi kerak.

Yuqoridagi bosqichlarning to‘g‘ri amalga oshirilishi yakuniy bosqich – sotishni amalga oshirishga imkon yaratadi. Siz tomoningizdan tovarni sotish shakllari va bosqichlarining to‘g‘ri yo‘lga qo‘yilishi nafaqat sotish hajmini oshiradi, balki doimiy mijozlar doirangizni shakllantirishga imkon yaratadi.