Tabiiy resurslar / Suv va suvdan foydalanish]

57-modda. Ichimlik suvdan sanoat maqsadlari uchun foydalanishni cheklash
Oldingi tahrirga qarang.
Tabiiy ofat, avariyalar ro‘y bergan taqdirda va boshqa favqulodda holatlarda, shuningdek korxona vodoprovod suvini limitdan ortiqcha olgan taqdirda, mahalliy davlat hokimiyati organlari aholining ichimlik suvga bo‘lgan ehtiyojlarini va maishiy ehtiyojlarini birinchi navbatda qondirish manfaatlarini ko‘zlab, kommunal vodoprovodlardan sanoat maqsadlari uchun ichimlik suv iste’molini qisqartirishga yoki taqiqlab qo‘yishga va idoralarga qarashli ichimlik suv beradigan xo‘jalik vodoprovodlari suvidan sanoat maqsadlari uchun foydalanishni vaqtincha cheklab qo‘yishga haqlidir.
(57-moddaning matni O‘zbekiston Respublikasining 2009-yil 25-dekabrdagi O‘RQ-240-sonli Qonuni tahririda — O‘R QHT, 2009-y., 52-son, 555-modda)
58-modda. Yer osti suvlaridan texnika suv ta’minoti va boshqa sanoat maqsadlari uchun foydalanish
Ichimlik suvlar qatoriga kiritilgan yer osti chuchuk suvlaridan ishlab chiqarish-texnika maqsadlari uchun foydalanish taqiqlanadi, zarur yer usti suv manbaalari mavjud bo‘lmagan hududlarda foydalanadigan hollar bundan mustasnodir.
Ichimlik yoki shifobaxsh suvlar qatoriga kiritilmagan yer osti suvlaridan (chuchuk, mineral va issiq suvlardan) foydalanishga loyiq tasdiqlangan zaxiralari bo‘lsa, belgilab qo‘yilgan tartibda texnika suv ta’minoti uchun, mazkur suv tarkibidagi kimyoviy elementlarni ajratib olish, issiqlik energiyasi hosil qilish va boshqa ishlab chiqarish ehtiyojlari uchun suvdan oqilona foydalanish va uni muhofaza qilish talablariga rioya qilingan holda foydalanish mumkin.
59-modda. Suv obyektlaridan gidroenergetika ehtiyojlari uchun foydalanish
Oldingi tahrirga qarang.
Suv obyektlaridan gidroenergetika ehtiyojlari uchun foydalanish iqtisodiyotning boshqa tarmoqlari manfaatlari hisobga olinib, suv xo‘jaligi organlari bilan kelishilgan holda, shuningdek, agar O‘zbekiston Respublikasi Vazirlar Mahkamasining qarorida, tegishli hollarda esa, suv xo‘jaligi hamda ekologiya va atrof-muhitni muhofaza qilish organlarining qarorida boshqacha tartib nazarda tutilmagan bo‘lsa, suvlardan kompleks va oqilona foydalanish talablariga rioya qilingan holda amalga oshiriladi.
(59-moddaning birinchi qismi O‘zbekiston Respublikasining 2021-yil 30-noyabrdagi O‘RQ-733-sonli Qonuni tahririda — Qonunchilik ma’lumotlari milliy bazasi, 01.12.2021-y., 03/21/733/1112-son — 2022-yil 2-martdan kuchga kiradi)
Gidroenergetika ehtiyojlari uchun berib qo‘yilgan suv obyektlaridan tabiiy sharoitlarga, xo‘jalik ehtiyojlari va o‘zga ehtiyojlarga qarab, boshqa maqsadlar uchun ham foydalaniladi.
Oldingi tahrirga qarang.
Gidroenergetika korxonalari ushbu Qonunning 35-moddasida nazarda tutilgan majburiyatlardan tashqari:
suv obyektlarining foydalanish qoidalarida belgilangan ish rejimiga, shu jumladan suv omborlarini to‘ldirish va ishga tushirish, ulardan suv chiqarish hamda suvning yuqori va quyi sathi o‘zgarishining rejimiga rioya etishi;
sanitariya va tabiat muhofazasi maqsadlarida suv omborlaridan suv chiqarib turilishini ta’minlashi shart.
(59-moddaning uchinchi qismi O‘zbekiston Respublikasining 2009-yil 25-dekabrdagi O‘RQ-240-sonli Qonuni tahririda — O‘R QHT, 2009-y., 52-son, 555-modda)
[OKOZ:
1.11.00.00.00 Atrof tabiiy muhit va tabiiy resurslar / 11.05.00.00 Suvdan foydalanish va muhofaza qilish / 11.05.05.00 Suvdan foydalanish turlari / 11.05.05.05 Suvdan baliqchilik xo‘jaligi ehtiyojlari uchun foydalanish]