Shıǵıs xalıqları mánawiyatı rawajlanıwınıń retrospektiv tiykarları hám ózine tán qásiyetleri Jobası

Shıǵıs xalıqları mánawiyatı rawajlanıwınıń retrospektiv tiykarları hám ózine tán qásiyetleri
Jobası:
1.1. Áyyemgi Shıǵıs xalıqları awızeki dóretpeleri hám jazba esteliklerinde watansúyiwshilik ideyalarınıń sáwleleniwi
1.2. Shıǵıs oyanıw dáwiri oyshılları miynetlerinde ideyalıq tárbiya máseleleri
1.3 Shıǵıs oyanıw dáwiri oyshıllarınıń islam máriypatshılıǵın rawajlandırıwdaǵı ornı
1.4 Qaraqalpaq xalıqı klassik oyshılları shıǵarmalarında kámil insannıń pazıyletleri haqqındaǵı kóz-qarasları
Elimizde erkin hám párawan turmıs, kúshli huqıqıy-demokratiyalıq mámleket, ádil puqaralıq jámiyet qurıw jolında keń kólemli reformalar ámelge asırılmaqta. Bul iygilikli maqset tiykarında insan hám onıń mápleri jámlesken bolıp, onıń nátiyjeliligi xalıqımız mánawiy-ruwxıy kóz-qaraslarındaǵı jańalanıw, jámiyetimiz sanası, oy-pikirindegi jetilisiw menen tikkeley baylanıslı bolıp tabıladı.
Prezidentimiz Sh.M. Mirziyoyev 19 sentyabr kúni Birlesken Milletler Shólkemi Bas Assambleyasınıń 72-sessiyasındaǵı bayanatında «birinshi náwbette, jaslardıń sanasın, oy-pikirin bilim tiykarında qáliplestiriw hám tárbiyalaw eń áhmiyetli wazıypa bolıp tabıladı» dep¹, Sonnan bir neshe ay aldın, Prezident Sh.M. Mirziyoyev “Kámolat” jaslar jámiyetlik háreketiniń IV-qurultoyındaǵı bayanatında «Jas áwlad tárbiyası hámme zamanlarda da áhmiyetli hám aktual ahmiyetke iye bolıp kelgen. Biraq biz jasap atırǵan XXI-ásirde bul másele haqıyqattan da baslı máselege aylanıp barmaqta» dep ayrıqsha aytıp ótken edi².
Kurs jumısı temasınıń aktuallıǵı. Hesh qashan hesh bir xalıq, elat basqa xalıqlardan úzilib qalǵan, óz halınsha jasaǵan emes, bunday jaǵdayda hesh qanday rawajlanıw bolmaǵan bolar edi. Eń áyyemgi hám antik dáwirlerde uzaq aralıqlardı at -arbalarda basıp ótiw bir qansha quramalı bolgan jaǵdaylarda da babalarımız Mısr, Babil, Oraylıq Greciya sıyaqlı aymaqlar menen baylanıs ornatqan. Jipek jolınıń kóp bólegi mámleketimiz territoriyasınan ótiwi ónermentshilik, sawda-satıqtıń erte hám keń rawajlanıwına alıp keldi. Babalarımız sonshelli ısker hám uqıplı bolǵan bolıp, Vizantiya imperatorları uzaq waqıtlarǵa shekem ózlerininń diplomatiyalıq hám finanslıq jumıslarına samarqandlıqlardı, ulıwma, watanımız wákillerin qosqan. Uzaq ótmishte Oraylıq Aziyada jasaǵan xalqlardıń jazıwları — Xorezm jazıwı, parfiya jazıwı, soǵd jazıwı, grek-baktriya jazıwı, áyyemgi turkiy jazıw bolsa-da, bizge shekem olardıń kóp úlgileri saqlanıp jetip kelmegen. Hátteki zardushtiyliktiń muqaddes kitabı “Avesto”nıń tek úshten bir bólegi ǵana bizge shekem jetip kelgen. Watanımızdıń uzaq ótmishi Shıǵıs mámleketlerinde áyyemde jasaǵan xalqlardan qolǵan jazba estelikler, áyyemgi Gretsiya hám Rim avtorlarınıń dóretpelerinen tabamız. Bul orında Gerodot, Ktesiy, Strabon, Arrian, Diodor hám basqada oyshıllar teńsiz bahaǵa iye bolıp tabıladı. Tilekke qarsı, elege shekem xalıqlarımızdıń uzaq ótmishin, olardıń ulıwma insanıy mánawiyat rawajlanıwına qanday úles qosqanın tolıq jarıtıp beriwshi izertlewler oǵada kem bolıp tabıladı.