Сценарий муаллифи: Донохон Хамидуллаева Ҳам муаллиф: Шоирахон Рустамова Режиссёр: Шохрух Ҳайдаров

Кадрда титр берилади: Орадан вақт ўтди...
5 – ЭПИЗОД.
Кадрда офис хонаси. Имона чиройли кийиниб олганча раҳбар хонасини тозалаяпди. Кайфияти яхши. Ойнага қараб қўяди. Сочларини ҳам чиройли причёска қилиб олган. Хонага кириб келган Саид Имонага кулимсираб: Яхшимисиз, Имонахон? Тинчликми, бугун жуда очилиб кетибсиз? Учрашувга чиқмаяпсизми, мободо? Ишқилиб яқин орада тўйингиз бўп кетса мен яхши ходимимдан айрилиб қолмайманми?
Имона кулимсираб: Ота-онаси йўқ етимча, камбағал, сепсиз қизга уйланаман деб кимнинг кўзи учиб турибди Саид ака, қизиқ гапларни гапирасиза?
Саид: Ҳа ҳаёт шунақа бешафқат экан, яхши йигитларга ёмон қизлар, ёмон йигитларга эса яхши қизлар учрар экан. Менам хотиним билан ажрашяпман.
Имона: Шунча йил яшаб-а?
Саид: Ҳа, ўртада меҳр бўлмаса юз йил яшасанг ҳам ҳеч нарса ушлаб қололмас экан. Имона бир савол берсам ҳафа бўлмайсизми?
Имона: Бемалол сўрайверинг.
Саид: Нима десам экан. Анчадан бери сизга қалбимда илиқлик бор. Агар мени уйланиб ажрашган эркак деб қарамасангиз, менга турмушга чиқармидингиз? Рози бўлсангиз, бошимда кўтариб юрардим.
Имона қизариб кетади: Ҳайронман, бу ҳақида ҳечам ўйлаб кўрмаган эканман. Ўзи яқиндан бери сиз билан энди гаплашяпман. Авваллари фақат салом аликдан нарига ўтмасдик-ку.
Саид: Мени эса анчадан бери хаёлим сизда.
Имона: Саид ака, ишларимни қилиб бўлдим, мен бора қолай... деб чиқиб кетмоқчи бўлганда, Саид унинг қўлларидан ушлаб: Жавобингизни айтмадингиз. Имона кўзларини катта очганча: Бир нима дейишга ожизлик қиламан. Барибир аёлингиз бизни тинч қўймайди.
Саид: Аёлим аллақачон отасиникига кетиб бўлган. Ҳозирча бировга билдирмай никоҳ ўқитиб сизникида яшаб турамиз. Аёлим билан ажрашиб бўлишим билан сизни уйимга опкетаман. Фақат илтимосимни рад этманг.
Имона секин Саидни қўлларидан қўлини бўшатиб, унга табассум қилиб қўйганча офис хонасидан чиқиб кетади. Саид ўзига ўзи тиржайиб: Ўқ нишонга тегди Саидбой, энди ишни пайсалга солма... ЗТМ...