Саволномаси умумий хуқуқ сохаси бўйича

196. Қайси ҳолатларда никоҳдан ажратиш суд тартибида амалга оширилади?
Қоидаларнинг 109-бандига кўра, агар никоҳдан ажралишга эр-хотиннинг ўзаро розилиги бўлгани ҳолда умумий мулк ҳақида ёки меҳнатга лаёқатсиз, муҳтож эр ёки хотиннинг таъминоти ҳақида низолар бўлса, вояга етмаган болалари бўлганда, у ҳолда никоҳдан ажратиш суд тартибида ҳал этилади.
197. Суд томонидан бедарак йўқолган деб топилган эр (хотин) қайтиб келганда қай тартибда никоҳ тикланади?
ОК 48-модасига кўра, суд томонидан вафот этган деб эълон қилинган ёки бедарак йўқолган деб топилган эр (хотин) қайтиб келган ва тегишли суд қарорлари бекор қилинган ҳолларда, никоҳ эр-хотиннинг биргаликдаги аризасига кўра ФҲДЁ органида тикланиши мумкин. Агар эр (хотин) янги никоҳга кирган бўлса, никоҳни тиклаш мумкин эмас.


198. Далолатнома ёзувларини тиклаш деганда нимани тушунасиз?
ОКнинг 230-моддасида, фуқаролик ҳолати далолатномалари ёзувларини тиклаш деганда илгари шундай ёзув бўлганлигини тасдиқловчи етарли асослар бўлганида, уларни қайта тиклаб қўйиш тушунилиши белгиланган.
Туғилганлик, никоҳ тузилганлиги, никоҳдан ажралганлик ҳақидаги далолатнома ёзувлари бу ёзувлар кимга нисбатан тузилган бўлса фақат ана шу шахсларнинг аризасига кўра тикланади. Агар ўн олти ёшгача бўлган боланинг туғилиши ҳақидаги ёзув йўқолган бўлса ёзув боланинг ота-онаси, васийси, ҳомийси, болалар муассасаси маъмуриятининг аризасига биноан тикланади.
Далолатнома ёзувини тиклаш ҳақидаги ариза ФҲДЁ органи томонидан бир ой мобайнида кўриб чиқилиши керак. Узрли сабаблар (далолатнома ёзувини тиклаш учун асосланганликни тасдиқловчи ёзувлар нусхалари ва бошқалар олинмаганлиги) мавжуд бўлганда аризани кўриб чиқиш муддати ФҲДЁ мудири томонидан бир ойдан кўп бўлмаган муддатга узайтирилиши мумкин ва бу ҳақда ариза берувчига хабар қилинади.
Туғилиш, Никоҳ, Никоҳдан ажралганлик, Ўлим ҳақида далолатнома ёзувиларини тиклаш учун тақдим этилиши керак бўлган ҳужжатлар Қоидаларнинг 140-147-бандларида батафсил берилган.