Samarqand iqtisodiyot va servis instituti bektemirov abduxamid abdumalikovich

Tadqiqotning amaliy natijalari quyidagilardan iborat:
xorijiy davlatlarda va mamlakatimizda ko‘rsatiladigan xizmatlarni tadqiq qilish natijasida innovatsion xizmatlar ko‘lamini kengaytirish va tadbirkorlik faoliyatini rivojlantirish bo‘yicha tavsiyalar ishlab chiqilgan;
risklarning tadbirkorlik faoliyatida yuzaga kelish omillarini o‘rganish orqali ularning turlariga aniqlik kiritilgan;
xizmat ko‘rsatish korxonalarida risklarni baholash uslublarini tahlil qilish orqali progressiv usullardan foydalanilgan;
xizmat ko‘rsatish korxonalarida risklar darajasini pasaytirish orqali faoliyat samaradorligini oshirish mexanizmlari ishlab chiqilgan.
Tadqiqot natijalarining ishonchliligi. Tadqiqotda qo‘llanilgan yondashuv va usullarning belgilangan maqsadga muvofiqligi hamda ilmiy asoslanganligi, foydalanilgan ma’lumotlarning rasmiy manbalardan olinganligi, o‘tkazilgan so‘rovnomalar maxsus talablar asosida olib borilganligi, keltirilgan xulosa va takliflarning amaliyotga joriy etilganligi bilan izohlanadi.
Tadqiqot natijalarining ilmiy va amaliy ahamiyati. Ilmiy ahamiyati unda ishlab chiqilgan ilmiy tavsiyalardan foydalanish mumkinligi, xizmat ko‘rsatish korxonalarida risklarni baholash va pasaytirish usullarini takomillashtirishning nazariy-metodologik asoslari ishlab chiqilganligi, xizmat ko‘rsatish subyektlari faoliyat samaradorligini ta’minlashda risklarni baholash va boshqarish mexanizmini takomillashtirish, sohadagi xo‘jalik subyektlari raqobatbardoshligini ta’minlash bilan bog‘liq ilmiy xulosalardan ushbu yo‘nalishlardagi tadqiqotlarda nazariy manba sifatida foydalanish mumkinligi bilan izohlanadi.
Amaliy ahamiyati ulardan respublikadagi xizmat ko‘rsatish korxonalari faoliyatini rivojlantirish, tadbirkorlik subyektlarida vujudga keladigan risklarni baholash va pasaytirish orqali, ularning faoliyat samaradorligini oshirish bo‘yicha qabul qilinayotgan normativ-huquqiy hujjatlar hamda sohaga oid boshqa me’yoriy hujjatlarni tayyorlash va kompleks chora-tadbirlar rejasini ishlab chiqish, shuningdek, oliy o‘quv yurtlarining o‘quv jarayonida, jumladan, «Kichik biznes va tadbirkorlik», «Investitsiya va innovatsiyalar», «Moliyaviy menejment», «Antiinqiroziy boshqaruv», «Iqtisodiy xavfsizlik», «Korxona iqtisodiyoti va innovatsiyalarni boshqarish» fanlari bo‘yicha o‘quv adabiyotlar (darslik, o‘quv-uslubiy qo‘llanmalar), xizmat ko‘rsatish korxonalarida tadbirkorlik faoliyati muammolari bo‘yicha maxsus kurslar va metodik qo‘llanmalar tayyorlashda foydalanish mumkinligi bilan izohlanadi.