Samarqand iqtisodiyot va servis instituti bektemirov abduxamid abdumalikovich

Tadqiqotning respublika fan va texnologiyalari rivojlanishining ustuvor yo‘nalishlariga mosligi. Dissertatsiya tadqiqoti respublika fan va texnologiyalar rivojlanishining I. «Demokratik va huquqiy jamiyatni ma’naviy-axloqiy va madaniy rivojlantirish, innovatsion iqtisodiyotni shakllantirish» ustuvor yo‘nalishiga muvofiq bajarilgan.
Muammoning o‘rganilganlik darajasi. Xizmat ko‘rsatish sohasining iqtisodiyotda tutgan o‘rni, uning mohiyati va ahamiyati, tadbirkorlik faoliyatida yuzaga keladigan risklar va ularning turlari, risklarni baholash va pasaytirish yo‘llari bilan bog‘liq ilmiy tadqiqot ishlari A.Smit, L.Valras, A.Marshall, A.Pigu, K.Marks, Y.Shumpeter, J.Keyns, G.Mulen, F.Nayt, F.Kotler, V.Shiray, I.Aleshina, R.Nureyev I.Kiselova, S.Vasin, A.Samoxvalova, G.Axtamova, A.Romanova, L.Zirchenko, O.Firsova, I.Sokolova, B.Rayzberig, N.Radayev, T.Gurnovich³ singari xorijlik iqtisodchi olimlar tomonidan chuqur tadqiq etilgan. Shuningdek, so‘nggi yillarda mamlakatimizda ham xizmat ko‘rsatish sohasi va uni rivojlantirishning nazariy-uslubiy muammolari, xizmat ko‘rsatish korxonalarining samaradorligini oshirish hamda risklarni boshqarishga oid masalalar Y.Abdullayev, Q.Abdurahmonov, M.Muxammedov, M.Pardayev, J.Qurbonov, I.Tuxliyev, K.O‘razov, B.Abdukarimov, Q.Mirzayev, Sh.Mustafaqulov, X.Mamatqulov, A.Saidov, I.Ochilov⁴ va boshqalarning ilmiy izlanishlarida o‘z aksini topgan.
Ammo, tadbirkorlik subyektlari, xususan, xizmat ko‘rsatish korxonalarida yuzaga keladigan risklarni mavjud ijtimoiy-iqtisodiy vaziyat va imkoniyatlardan kelib chiqqan holda baholash hamda pasaytirish yo‘llarini aniqlash bo‘yicha yaxlit ilmiy izlanishlarning yetarlicha olib borilmaganligi mazkur dissertatsiya mavzusini tanlash, uning maqsad va vazifalarini belgilash uchun asos bo‘ldi.
Dissertatsiya tadqiqotining dissertatsiya bajarilgan oliy ta’lim muassasasining ilmiy tadqiqot ishlari bilan bog‘liqligi. Dissertatsiya tadqiqoti Samarqand iqtisodiyot va servis institutining «Iqtisodiyotdagi chuqur tarkibiy o‘zgarishlar sharoitida xizmat ko‘rsatish sohasi tarmoqlarini rivojlantirishning nazariy va amaliy muammolari» mavzusidagi ilmiy tadqiqot ishlari rejasiga muvofiq bajarilgan.