Салық ҳәм салыққа тартыў пәнинен мәселелер

Физикалық тәреплерден алынатуғын жер салығы
Салық кодексине муўапық өз мулкинде, ийелигинде, пайдаланыўында яки ижара ҳуқуқы тийкарында жер участкаларына ийе болған физикалық тәреплер, сондай-ақ юридикалық тәреп қураған ҳәм қурамаған ҳалда дүзилген дийхан хожалықлары жер салығын төлеўшилери болып есапланады.
Өзбекистан Республикасы Министрлер Кабинети, Қарақалпақстан Республикасы Министрлер Кеңеси, жергиликли мәмлекет ҳәкимият органлары тәрепинен ижараға берилген жер участкалары ушын төленетуғын ижара ҳақы жер салығына теңлестириледи. Жер участкаларын ижараға алған физикалық тәреплерге жер салығын төлеўшилер ушын белгиленген жеңилликлер, салықты есаплап шығарыў, салық есап–китапларын тапсырыў ҳәм салықты төлеў тәртиби киритиледи.
Салық кодексине муўапық көшпес мүлкке ийе болған ҳуқуқларды мәмлекет дизиминен өткизиўди әмелге асырыўшы органның жер участкаларының майданына байланыслы мағлыўматнамалар салық салынатуғын база болып есапланады.
Салық төлениўи ҳаққындағы төлеў хабарнамалары физикалық тәреплерге мәмлекетлик салық органлары тәрепинен ҳәр жылы, сол жылдың 1-майынан кешиктирмей тапсырылады.
Жер участкаларының майданы өзгергенде ҳәм жыл даўамында жеңиллик ҳуқуқы пайда болғанда яки бийкар қылынғанда мәмлекетлик салық органлары бир ай даўамында салықты қайта есап –китап қылыўлары ҳәм салық төлеўшиге төлеў мүддетлери өзгергенин есапқа алған ҳалда жаңа яки қосымша төлеў хабарнамасын бериўи шәрт.
Көп қабатлы турақ жайларда жасайтуғын физикалық тәреплерден жер салығы өндирилмейди. Ийелик қылыў ҳуқуқы мийрас бойынша турақ жай, турақ жай емес имарат ҳәм қурылыслар, бағы, үйи өтиўи менен бирге өткен жер участкалары ушын жер салығы мийрасхорларынан, мийрас қалдырыўшының салық мәжбүриятларын есапқа алған ҳалда өндириледи.
Физикалық тәреплер есапланған жыллық жер салығын 15-октябрьден кешиктирмей төлейди. Төленген салық сўммасы белгиленген тәртипте жергиликли бюджетке түседи.
Жыл даўамында ажыратылған жер участкалары ушын салық жер участкасы ажыратылған айдан кейинги айдан баслап төленеди.