Revmatizm va yurak kasalliklari

Revmatizm va yurak kasalliklari
Reja:
1.Revmatizm.
2.Revmatik endokardit, miokardit, perikardit, poliartrit, xoreya.
3.Yurakning ishemik kasalligi.
4.Stenokardiya.
5.Miokard infarkti.
1.Revmatizm - biriktiruvchi to‘qimaning yallig‘lanishi natijasida yurak-qon tomir, tayanch-harakat (bo‘g‘imlar), nerv tizimlarining zararlanishi bilan kechadigan infeksion-allergik kasallikdir.
Revmatizmda birinchi navbatda yurak zararlanadi, ya`ni yurakning eng ko‘p uchraydigan kasalliklari bo‘lmish endokardit, miokardit, perikardit kasalliklari. Endokardit tufayli sodir bo‘ladigan yurakning porok (norasolik) kasalligining asosiy sababchisi revmatizmdir. Shu bois revmatizm yurak-qon tomirlari kasalliklari mavzusida o‘rganiladi.
Sababi: Revmatizmni vujudga kelishiga tez-tez takrorlanadigan angina, surunkali tonzillit, gaymorit, yiringli otit, tish kasalliklari sabab bo‘ladi.
Belgilari: Revmatizm aksariyat hollarda bog‘cha va kichik maktab yoshidagi bolalarda boshlanadi. Ko‘pincha yurakning endokardit, miokardit, perikardit kasalliklarini yuzaga keltiradi. Bu kasalliklar birlashtirilgan holda revmokardit (yurakning revmatizm kasalligi) deb ataladi.
2.Revmatik endokardit. Yurakning ichki qavatini yallig`lanishi.
Belgilari: yurak sohasida kuchsiz gijimlovchi og‘riq, harakat qilganda yurak urishining tezlashuvi, bemor rangining oqarishi, tez charchashi kuzatiladi. Ammo, ko‘p hollarda bolalar bu belgilarga e‘tibor bermaydilar, yoki o‘z vaqtida me’yoriga yetkazib davolanmaydilar. Shu tufayli endokarditning asorati sifatida yurakning porok (norasolik) kasalligi vujudga keladi. Yurak porok kasalligi ko`pincha sezilmagan holda kechadi va tibbiy ko`rik paytida to`satdan aniqlanadi. Yosh ulg‘ayganda yurak porogi natijasida surunkali yurak-qon tomir yetishmovchiligi tufayli bemor nogironga aylanishi mumkin.
Revmatik miokardit. Yurakning o`rta (muskul) qavatini revmatizm tufayli yallig`lanishi endokarditdan ko`ra ko`proq uchraydi.