Respublika ta’lim markazi umumiy o‘rta ta’limning davlat ta’lim standarti va o‘quv dasturi

29-31-mavzu. Alisher Navoiy. Hikoyatlar. (3 soat, A2+: 4 soat)
Navoiy hikmatli so‘zlarining mazmun-mohiyati, umrboqiyligi.
“Mahbub ul-qulub” - hayotiy hikmatlar majmuasi sifatida. “Saxovat va himmat bobida”, “Hilm zikrida”, “Safar manofii zikrida” qismlaridagi ilm va hunar, yaxshilik, insoniylik, rostgo‘ylik va yolg‘onchilik, sabr va qanoat, mehr, vafo, insoniylik haqidagi hikmatlarning o‘ziga xosliklari. Ularning xalq maqollariga yaqinligi, ulardan farqi. Bu hikmatlarning ma’naviy-axloqiy, ta’limiy, tarbiyaviy va badiiy ahamiyati, hikmatlarda hayotiy hodisalarning qisqa, ixcham, lo‘nda va ta’sirchan ifodalangani. Ulardagi badiiy tasvir vositalari.
32-33-mavzu. Muhammadsharif Gulxaniy. “Zarbulmasal”.(2 soat, A2+: 4 soat)
Gulxaniyning hayoti va ijodi haqida qisqacha ma’lumot.
“Maymun bilan najjor” hikoyati, undagi majoziy obrazlar talqini. Maymun – uquvsizlik timsoli. Uning tasviridagi yumoristik ohang. Hikoyada tabiat tasvirining o‘rni.
“Toshbaqa bilan chayon” hikoyatida ezgulik va yomonlik tasviri. Yomonlik ijtimoiy-ma’naviy illat sifatida. Masalda dialoglarning o‘rni. Masalning badiiy xususiyatlari.
34-35-mavzu. Avaz O‘tar. “Til”, “Fidoyi xalqim”, “Sipohi pora istar”, “Biling, ushbu zamon g‘amnokidurman” she’rlari. (2 soat)
Avaz O‘tar hayoti va ijodi haqida qisqacha ma’lumot. Avaz O‘tar adabiyotdagi yangi mavzu va g‘oyalar kuychisi sifatida.
“Til”, “Fidoyi xalqim”, “Sipohi pora istar”, “Biling, ushbu zamon g‘amnokidurman” she’rlarining mazmun-mohiyati, g‘oyaviy-badiiy xususiyatlari.
36-37-mavzu. Abay. Nasihatlar. (2 soat)
Abay hayoti va ijodi haqida qisqacha ma’lumot.
Abayning odob-axloqqa doir qarashlari. Ijodkorning ta’lim-tarbiyaga, ilm olishga, to‘g‘rilikka oid nasihatlarining umuminsoniy mazmun-mohiyati. Abay nasihatlarida sharqona odob va axloq masalalarining ifodalanishi. Mazkur nasihatlarning tarbiyaviy ahamiyati.
Haydar Xorazmiy. “Bo‘z to‘quvchi kampir” hikmati. (A2+3 soat)
Adib hayoti va ijodi haqida qisqacha ma’lumot. Hikmatning ma’naviy-axloqiy, ta’limiy, tarbiyaviy ahamiyati. Unda manfaat uchun ikki yuzlamachilik qilishning qoralanishi. Asarda hayotiy voqeaning ta’sirchan ifodalangani. Hikmatning badiiy xususiyati.