Режа: Геология, минерология, петрография фанларининг мазмуни, мақсади, вазифаси

1-МАВЗУ: ИНЖЕНЕРЛИК ГЕОЛОГИЯСИ ФАНИНИНГ МАҚСАД ВА ВАЗИФАЛАРИ.
РЕЖА:
1. Геология, минерология, петрография фанларининг мазмуни, мақсади, вазифаси.
2. Геология, минерология, петрография фанларининг ўзаро боғлиқлиги, ривожланиш тарихи ва бошқа фанлар билан боғлиқлиги.
3. Геология, минерология, петрография фанларининг қурилиш ишлаб чиқариш технологиясидаги аҳамияти.
Таянч атама ва иборалар:
Геология-грекча сўз бўлиб гео-ер, логос-сўз, фан демакдир, шундай қилиб геология-ер ҳақидаги фан бўлиб, унинг пайдо бўлиш жараёнини, ривожланиш тарихини, тузилишини, таркибини, унда содир бўладиган ички ва ташқи геологик жараёнларни ўрганади.
Геология-табиат фанлар туркумига киради.
Инсоният фойдаланадиган табиий бойликлар ер қаъридан олинади. Улар Ер пайдо бўлиши тарихида, геологик жараёнлар натижасида Ер ҳозирги ҳолатига келган.
Табиий қазилма бойликларининг, шу жумладан табиий қурилиш хом ашёларининг ҳам ер қаърида қандай жойлашиши ва тарқалиш қонуниятларини билишимиз ва улардан халқ хўжалигида фойдаланишимиз, уларнинг қандай пайдо бўлишини ва геологик жараёнлар натижасида вужудга келганини ўрганишимиз ва билишимиз жуда муҳимдир.
Шунинг учун геология фани халқ хўжалигида жуда муҳим ахамиятга эгадир. Инсоният ривожланиб, табиатни ўрганиши, ундаги табиий бойликлардан кўпроқ фойдаланиш эҳтиёжи ошган сари, геология фани ҳам ривожланиб борди ва шу ривожланиш тарихида, ҳозирги даврда ўзининг қўйидаги мустақил тармоқларига эга бўлди: умумий геология, минералогия, кристалография, тарихий геология, петрография, тектоника, геоморфология, тўртламчи давр геологияси, геофизика, гидрогеология, инженерлик геологияси ва бошқалар.
Умумий геология-ернинг ички ва ташқи қисмида содир бўлган ва бўлаётган геологик жараёнларнинг ривожланиш ва сўниш қонуниятларини, келиб чиқадиган оқибатларини ўрганади.
Кристалография-минералларнинг кристал тузилишини ўрганувчи фандир. Минералларнинг кристал панжарасини ҳосил бўлиш йўлларини ўрганиб, шу минерал ҳосил бўлиш жараёнида қандай геологик жараёнлар содир бўлганини ўрганади.