Real iqtisodiyot

Kichik biznes subyektlari uchun kredit turlari

Shaxsiy yordamchi va dehqon xo‘jaliklariga chorvachilikni rivojlantirishni kreditlash
Shaxsiy yordamchi va dehqon xo‘jaliklariga Bandlik jamg‘armasi kredit liniyasi hisobidan chorvachilikni rivojlantirish uchun beriladigan imtiyozli maqsadli mikrokreditlar (keyingi o‘rinlarda – mikrokreditlar) miqdori eng kam oylik ish haqining 80 baravarigachani tashkil etadi.
Ushbu mikrokreditlar shartnoma asosida, faqat kam ta’minlangan oilalarga 3 yilgacha bo‘lgan muddatga, qaytarish muddatini uzaytirish huquqisiz beriladi.
Bankning o‘z mablag‘lari hisobidan berilgan mikrokreditlardan foydalanganlik uchun foiz savkasi miqdori Markaziy bankning qayta moliyalash savkasi darajasidan yuqori bo‘lmagan miqdorda belgilanadi.
Mikrokreditlar olish uchun shaxsiy yordamchi xo‘jaligi yurituvchi jismoniy shaxs yoki dehqon xo‘jaligi boshlig‘i tomonidan bankka quyidagi hujjatlar taqdim etiladi:
– chorvachilikni rivojlantirish uchun mikrokredit berishni so‘rab ariza;
– mahalla, qishloq, ovul fuqarolar yig‘ini Kengashlarining ushbu mikrokredit oluvchi jismoniy shaxsga chorvachilikni rivojlantirish uchun bank tomonidan mikrokredit berilishiga tavsiyanomasi. Mahalla, qishloq, ovul fuqarolar yig‘inining Kengashlari tomonidan chorvachilikni rivojlantirish uchun bank tomonidan kredit berilishi to‘g‘risidagi tavsiyanomada shaxsiy yordamchi xo‘jaligi yoki dehqon xo‘jaligida qoramol boqish uchun sharoit mavjudligi, ushbu oila kam ta’minlangan oila ekanligi, uning tarkibida doimiy ish joyiga ega bo‘lmagan oila a’zolari mavjudligi alohida ta’kidlanishi lozim. Tavsiyanoma mahalla, qishloq, ovul fuqarolar yig‘ini Kengashining raisi tomonidan imzolanib, gerbli muhr qo‘yilgan bo‘lishi lozim;
– jismoniy shaxs yoki dehqon xo‘jaligi boshlig‘i o‘z pasportini shaxsan ko‘rsatadi va pasport nusxasi kredit yig‘ma jildiga tikib qo‘yiladi.
– qarz oluvchilar mikrokreditlarni qaytarilishini ta’minoti sifatida bankka quyidagi ta’minot turlaridan birini taqdim etishlari mumkin:

• 
  mol-mulk garovi;
  
• 
  bank yoki sug‘urta kompaniyasi kafolati;
  
• 
  uchinchi shaxs kafilligi;
  
• 
  qarz oluvchi tomonidan olingan kreditni qaytarilmaslik xatarining bank-benefitsiar foydasiga sug‘urta qilinganligi to‘g‘risidagi sug‘urta polisi.