Qurilish ekologiyasi

Ekologiya va uning vazifalari
Hozirgi kunda iqtisodiyotning turli real tarmoqlarida “Sanoat ekologiyasi”, “Kimyo ekologiyasi”, “Biokimyoviy ekologiya”, “Qishloq xo’jalik ekologiyasi”, “Harbiy ekologiya”, “Psixo ekologiya”, “Ijtimoiy ekologiya”, “Inson ekologiyasi”, “Qurilish ekologiyasi” kabi yo’nalishlar rivojlanmoqda. Ekologiya garchi biologiya fanidan kelib chiqqan bo’lsada, u nafaqat biologik fanlar bilan, balkim juda ko’p nobiologik fanlar bilan ham uzviy bog’liq. Bunday fanlar qatoriga matematika, fizika, kimyo, geodeziya, arxitektura, dizayn, nazariy mexanika, binolar va inshootlar qurilishi, qurilish materiallari va buyumlari, qurilish sanoatining texnologik uskunalari va boshqa fanlar bilan uzviy bog’liq.
Buni quyidagi bir necha misollarda ko’rish mumkin:

• matematika fani bilan aloqasi – ekologiyani matematik modellashtirish asosida “yirtqich-o’lja” hamda “parazit-xo’jayin” munosabatlarini o’rganish;
• fizika fani bilan aloqasi – quyosh energiyasi, elektromagnit va tovush to’lqinlari, radioaktiv nurlanish, issiqlik rejimi va boshqalarning organizmlarga ta’sirini o’rganish;
• kimyo fani bilan aloqasi – organik va mineral moddalarning tabiatda aylanishini o’rganish va sh.k.

Ekologiyaning maqsadi - hozirgi va kelajak avlodlar uchun ekologik xavfsiz muhitni ta’minlash, ekologik xavfsiz muhit organizmlarning barqaror holatda ko’payishi, o’sishi va rivojlanishi uchun toza, sog’lom va qulay tabiiy atrof-muhit holati demakdir.

“Еkologiya” fanini o’qitishdan maqsad – talabalarga tabiat va uning resurslaridan oqilona foydalanish, tabiiy atrof-muhitni muhofaza qilish va saqlash, suv va tuproq resurslari, qurilish va shaharsozlik ekologiyasi, ekologik arxitektura, qurilish jarayonining atrof-muhitga ta’siri, bino va inshootlar qurilishida energiya va resurs tejamkorlik, poydevor qurilishida ekologik xavfsiz texnologiyalar, qurilish materiallari ekologiyasi, ikkilamchi resurslardan foydalanishning ilmiy asoslarini bilishdan iborat. Fanning vazifasi – talabalarni nazariy bilimlar, amaliy ko’nikmalar, qurilish ekologiyasining asosiy yo’nalishlari va uning ekologik talablariga uslubiy yondashuv hamda ilmiy dunyoqarashini shakllantirish.