Qonuni aholi bandligi to‘G‘risida

56-modda. Ishsizlik nafaqasi to‘lashni tugatish (to‘xtatib turish) tartibi
Mahalliy mehnat organining buyrug‘i ishsizlik nafaqasi to‘lashni tugatish (to‘xtatib turish) uchun asos bo‘ladi, unda ishsizlik nafaqasi to‘lashni tugatish (to‘xtatib turish) sababi va ishsizlik nafaqasini to‘lash tugatiladigan (to‘xtatib turiladigan) sana majburiy tartibda ko‘rsatiladi.
Ishsizlik nafaqasini to‘lash ushbu Qonun 55-moddasining birinchi qismida (beshinchi qismida) nazarda tutilgan tegishli ishonchli axborot olinganidan keyin mahalliy mehnat organi tomonidan tugatiladi (to‘xtatib turiladi).
Ishsizlik nafaqasi to‘lashni tugatish (to‘xtatib turish) to‘g‘risida mahalliy mehnat organining xodimi tomonidan “Bandlik xizmati” axborot tizimining tegishli bo‘limida va so‘rovnomada qayd etiladi, unda ishsizlik nafaqasini to‘lash tugatiladigan (to‘xtatib turilgan) sana, ishsizlik nafaqasi to‘lashni tugatish (to‘xtatib turish) sabablari, ishsizlik nafaqasi to‘lashni tugatish (to‘xtatib turish) uchun asos bo‘lgan buyruqning sanasi va raqami ko‘rsatiladi.
Mahalliy mehnat organi tomonidan chiqarilgan ishsizlik nafaqasi to‘lashni tugatish (to‘xtatib turish) to‘g‘risidagi qaror ishsiz shaxsga yetkazilishi shart.
Hisoblangan, lekin belgilangan muddatda olinmagan ishsizlik nafaqasi ishsiz shaxsga kelgusi oyda to‘lanadi.
57-modda. Ishsizlik nafaqalarining ortiqcha to‘langan summalarini ushlab qolish
Ishsizlik nafaqasining ortiqcha to‘langan summalari ishsiz shaxsdan, agar ortiqcha to‘lov hisob-kitobdagi xato natijasida yoki ishsiz shaxs tomonidan suiiste’mollik oqibatida sodir etilgan bo‘lsagina, ushlab qolinishi mumkin. Ushlab qolishlar ishsizlik nafaqasining keyingi to‘lanishlari chog‘ida amalga oshiriladi.
Hisob-kitobda yo‘l qo‘yilgan xato natijasida ortiqcha to‘langan summani ushlab qolish to‘g‘risidagi qaror noto‘g‘ri belgilangan miqdordagi ishsizlik nafaqasi oxirgi to‘langan kundan e’tiboran uch oydan kechiktirmay qabul qilinishi kerak. Ishsiz shaxs tomonidan suiiste’mol qilish bilan bog‘liq bo‘lgan ortiqcha to‘langan summani ushlab qolish to‘g‘risidagi qaror biror-bir muddatlar bilan cheklanmagan holda qabul qilinadi.
Agar ishsizlik nafaqasini oluvchi ishsiz shaxs g‘ayriqonuniy ravishda ishdan bo‘shatilgan bo‘lsa va sudning yoki boshqa vakolatli organning qaroriga ko‘ra ishsizlik nafaqasini oluvchi shaxs o‘ziga yetkazilgan zararning o‘rni qoplangan holda avvalgi ishiga tiklangan bo‘lsa, unga to‘langan ishsizlik nafaqasi ushbu shaxs tomonidan to‘liq miqdorda O‘zbekiston Respublikasi Bandlikka ko‘maklashish davlat jamg‘armasiga ixtiyoriy ravishda qaytariladi. Ushbu shaxs olingan ishsizlik nafaqasini ixtiyoriy ravishda qaytarishni rad etgan taqdirda to‘langan ishsizlik nafaqalarining butun summasi ushbu shaxsdan sud tartibida undiriladi.