Qonuni aholi bandligi to‘G‘risida

61-modda. Haq to‘lanadigan jamoat ishlariga jalb etiladigan shaxslarning mehnatiga haq to‘lash tartibi
Haq to‘lanadigan jamoat ishlariga jalb etiladigan shaxslar bilan haq to‘lanadigan jamoat ishlarida ishtirok etish uchun kamida ikki haftalik, lekin olti oydan ko‘p bo‘lmagan muddatga, ayrim hollarda esa O‘zbekiston Respublikasi Bandlik va mehnat munosabatlari vazirligi bilan kelishilgan holda, o‘n bir oygacha muddatga muddatli mehnat shartnomalari tuziladi.
Budjet tashkilotlari, fuqarolarning o‘zini o‘zi boshqarish organlari (shu jumladan jamoatchi xodimlar mehnatiga haq to‘lash bo‘yicha), shuningdek ko‘p kvartirali uylardagi uy-joy mulkdorlarining shirkatlari tomonidan (tutash hududlarni obodonlashtirish, ko‘kalamzorlashtirish va saqlash bo‘yicha) tashkil etiladigan haq to‘lanadigan jamoat ishlarida mahalliy mehnat organining yo‘llanmalariga ko‘ra haq to‘lanadigan jamoat ishlariga jalb etiladigan shaxslarning mehnatiga haq to‘lashga oid xarajatlarning o‘rni O‘zbekiston Respublikasi Bandlik va mehnat munosabatlari vazirligi huzuridagi Jamoat ishlari jamg‘armasining mablag‘lari hisobidan to‘liq qoplanadi. Bunda haq to‘lanadigan jamoat ishlariga jalb etiladigan shaxslarning mehnatiga haq to‘lash mehnatga haq to‘lashning eng kam miqdoridan kam bo‘lishi va mehnatga haq to‘lash eng kam miqdorining ikki baravaridan ko‘p bo‘lishi mumkin emas hamda mahalliy mehnat organi tomonidan yuborilgan shaxslar mehnatiga haq to‘lash bo‘yicha xarajatlarning o‘rni keyinchalik O‘zbekiston Respublikasi Bandlik va mehnat munosabatlari vazirligi huzuridagi Jamoat ishlari jamg‘armasining mablag‘lari hisobidan yuz foiz qoplanadi.
Tadbirkorlik subyektlari, nodavlat notijorat tashkilotlari tomonidan (bundan fuqarolarning o‘zini o‘zi boshqarish organlari va ko‘p kvartirali uylardagi uy-joy mulkdorlarining shirkatlari mustasno) tashkil etiladigan haq to‘lanadigan jamoat ishlarida mehnatga haq to‘lash bo‘yicha xarajatlarning ellik foizigacha bo‘lgan qismining o‘rni ish beruvchi bajarilgan ishlarni tasdiqlovchi hujjatni taqdim etgan taqdirda, O‘zbekiston Respublikasi Bandlik va mehnat munosabatlari vazirligi huzuridagi Jamoat ishlari jamg‘armasining mablag‘lari hisobidan qoplanadi. Bunda haq to‘lanadigan jamoat ishlariga jalb etiladigan bir shaxs mehnatiga to‘langan haqning o‘rnini O‘zbekiston Respublikasi Bandlik va mehnat munosabatlari vazirligi huzuridagi Jamoat ishlari jamg‘armasining mablag‘lari hisobidan qoplashning har oylik miqdori mehnatga haq to‘lash eng kam miqdorining ikki baravari miqdoridan oshmasligi kerak. Haq to‘lanadigan jamoat ishlariga jalb etiladigan shaxslarning mehnatiga har oyda haq to‘lash mehnat shartnomasi asosida belgilanadi.
Zarur bo‘lgan taqdirda, O‘zbekiston Respublikasi bandlik va mehnat munosabatlari vaziri O‘zbekiston Respublikasi Bandlik va mehnat munosabatlari vazirligi huzuridagi Jamoat ishlari jamg‘armasi tomonidan mehnatga haq to‘lashning o‘rnini qoplashning har oylik miqdorini mehnatga haq to‘lash eng kam miqdorining to‘rt baravarigacha miqdorda belgilashi mumkin.
Ishsiz shaxsning haq to‘lanadigan jamoat ishlarida ishtirok etishi davrida unga ishsizlik nafaqasini to‘lash to‘xtatib turiladi va haq to‘lanadigan jamoat ishlarini bajarish tugagan kundan e’tiboran tiklanadi.