Qarshi davlat universiteti iqtisodiyot kafedrasi davlat boshqaruvida inson resurslari

1. Oʻqituvchi tomonidan avval tayyorlangan materiallardan va oʻqilgan ma’ruzalardan foydalangan holda taklif qilingan mavzuni muhokama qilish. Oʻqituvchiga boʻlajak davlat xizmatchilariga doskada ilgari surilgan barcha gʻoyalarni yozib olishga yordam berish, guruh a’zolarining takliflarini aniq shakllantirish, noaniq yoʻnalishli munozaralardan qochish taklif etiladi. Ta’kidlash joizki, hatto mutlaqo nomaqbul gʻoyalar munozarada oʻrtaga tashlansa, bu orqali tinglovchilarning tasavvurini charxlash mumkin, vaholanki, voqelik bilan ziddiyatli gʻoyalarning paydo boʻlishi ishtirokchilarni yanada aniqroq variantlarni taklif etishga undaydi.
Oʻqituvchi mantiqiy fikrlash tizimini shakllantirishga qaratilgan savollar yordamida munozaraga rahbarlik qiladi. Masalan, dasturiy yondashuvda analitik usullardan foydalanishni muhokama qilishda muhim usullar (operatsiyalarni tadqiq qilish, tizim tahlili) dastlabki tahlil qilinadi. Soʻngra tinglovchilarning siyosiy, ijtimoiy-iqtisodiy, fanga oid bilim va koʻnikma-lari baholanadi. Davlat xizmatchilarini oʻqitishda elita va boshqa manfaatdor guruhlar (xususiylashtirish, soliq qonunchiligi, moliyaviy yordamni hududlarga taqsimlash va boshqalar)ning manfaatlarini e’tiborga olish ham muhimligi uqtirilishi lozim. Oʻquv mashgʻuloti davomida oraliq xulosa qilinadi: faqat "xarajat – foyda", "xarajat – iqtisodiy samaradorlik" va boshqa mezonlardan foydalangan holda, muhokama qilingan usullar doirasida tavakkalchilik va noaniqlik omillarini hisobga olgan holda taklif etilayotgan dasturlarni toʻliq tahlil qilish mumkin emas.
Seminar yakunida kutilgan natijalarga erishiladi, ya’ni boʻlajak davlat xizmatchilariga barcha muhim omillarni hisobga olish va kerakli natijaga erishish uchun ularni tizimlashtirish zarurligi uqtiriladi. Masalan, dasturiy yondashuv doirasidagi tahlillar, ikkita boshqa analitik usullarning yutuqlaridan foydalangan holda, taklif qilingan loyihalarning tashkiliy, taqsimot, joriy etish (amalga oshirish) va boshqa jihatlarini ham koʻrib chiqishga imkon beradi.
Seminar bir necha bosqichlarga boʻlinadi, har biridan soʻng koʻrib chiqilgan masalalar boʻyicha xulosalar chiqariladi va munozara maqsadi asosida qisqa xulosa qilinadi. Oraliq xulosalarni sarhisob qilish auditoriyadagi keraksiz takrorlanish va harakatlarning oldini oladi. Taklif etilgan gʻoyalar taqdimot ekrani (doska)da saqlanib qoladi, bu qoʻshimcha savollar paydo boʻlishiga zamin yaratib, tahlilni va yakuniy xulosalashni osonlashtiradi. Yakuniy xulosani shakllantirishda tinglovchilar (davlat xizmatchilari)ni jalb qilish maqsadga muvofiqdir. Yakuniy xulosani tayyorlashda tinglovchilarning fikri bilan umumiy qabul qilingan qoidalar oʻrtasida nomutanosibliklar kuzatilishi mumkin. U holda oʻqituvchi tomonidan tinglovchilarning notoʻgʻri fikr yuritayotganliklari tushuntirilishi, xatolar tuzatilishi va yakuniy xulosa e’lon qilinishi lozim.