Q. X. Abdurahmonov, Sh. R. Xolmo’minov, N. Q. Zokirova, A. B. Irmatova personalni boshqarish darslik Toshkent – 2011

Innovatsion kadrlar menejmenti (IKM) — bozor iqtisodiyoti va raqobatning kuchayishi sharoitida kadrlarga oid yangiliklar mehnat jarayonining ajralmas qismiga aylanishi va ularni tashkil etishni hamda boshqarishni talab qilishi.
Infratuzilma (lotincha — “ostida” so’zidan) ishlab chiqarish va tovar muomalasi, shuningdek inson hayot faoliyati uchun zarur bo’lgan, me’yoriy sharoitni ta’minlashga xizmat qiluvchi turli yordamchi xizmat ko’rsatuvchi sohalar, nomoddiy ishlab chiqarish sektori.
Inson resurslarini boshqarish vazifalari — bu, korxona va tashkilotlarning muayyan maqsadga erishish yo’lida inson resurslari bilan ishlaganda amalga oshiriladigan asosiy yo’nalishlaridir, ya’ni xodimlarni tanlash, xodimlarni tayyorlash va rivojlantirish, unga baho berish, rag’batlantirishdir.
Introversiya — (intro — ichki) shaxsning o’z shaxsiy manfaatlariga, ichki olamiga diqqat-e’tibori qayd qilinishi bilan ajralib turadi.
Ish joyida ta’lim berish — bu, ish joyining o’zida xodimning boy tajribaga ega bo’lgan murabbiy tomonidan ishni to’liqo’zlash-tirib olgunga qadar o’qitilishi (o’rgatilishi) bilan bog’liq bo’lgan holatdir.
Ish beruvchi — xodimni ishga olish huquqi bo’lgan yuridik yoki jismoniy shaxs.
Ish vaqti — xodimning ijtimoiy tashkil etilgan mehnatda ishtiroki davomiyligi me’yori (O’zbekiston Respublikasida haftasiga 40 soatdan ortiq bo’lmasligi kerak).
Ish kuni — xodimning ishlab chiqarish faoliyatida band bo’ladigan vaqti (O’zbekiston Respublikasida 6 kunlik ish haftasida 7 soat, 5 kunlik ish haftasida 8 soat).
Ishchi kuchi — tirikchilik ne’matlari ishlab chiqarishda foydalaniladigan insondagi jismoniy va ma’naviy qobiliyatlar majmui.
Ishchilar soni normasi — davlat va xo’jalik boshqaruvchi organlarining aniq maqsadlari, vazifalari va funktsiyalarini, hamda korxonaning ishlab chiqarish dasturlarini amalga oshirish uchun ishchilar uchun belgilangan son.
Ish o’rni — muayyan kasbdagi bir xodimning mehnat vazifalarini amalga oshirishi uchun moslashtirilgan va ishni bajarish uchun ishlab chiqarish vositalari, mehnat qurollari bilan jihozlangan joy.
Ish haqi — bu, ma’lum vaqt davomida kishilarning yaratgan mahsulotlari mikdori ko’rsatilgan xizmatlar va shu kabilarga asosan to’lanadigan mehnat haqidir.