Pul va banklar” faniga kirish. (2 soat) Reja: Kirish. Pul va banklar fanining maqsadi, predmeti va vazifalari. Fanning boshqa fanlar bilan bog’liqligi

Mavzu: “Pul va banklar” faniga kirish. (2 soat)

Reja:

Kirish.

1. Pul va banklar fanining maqsadi, predmeti va vazifalari .

2. Fanning boshqa fanlar bilan bog’liqligi.

3. Pul va uning iqtisodiyotdagi ro’li.

4. Pul va uning barqarorligi.

5. Pul va inflatsiya.

6. Pul va banklar.

7. Pul va kredit.

8. Banklar va boshqa moliya institutlari.

Tayanch so’z va iboralar:

pul, bank, pulning funksiyalari,kredit ,bank tizimi, pul nazariyalari, pul aylanmasi va pul tizimi, bank institutlari.

Kirish.

Mamlakatimiz iqtisodiyotining barcha jabhalarida bo’lgani kabi, bugungi kunda bank-moliya tizimida ham ijobiy yutuqlarga erishilmoqda. Ya’ni, Istiqlolning dastlabki yillaridan boshlab ushbu yo’nalishda izchil amalga oshirib kelayotgan islohotlar o’z mevasini bermoqda.

Pul va banklar uzoq muddatli ijtimoiy rivojlanishning natijasi bo’lib, zamonaviy sivilizatsiyaning muhim ajralmas qismi hisoblanadi. Ularning amal qilishi ijtimoiy mahsulotni ishlab chiqarish, taqsimlash, ayirboshlash va iste’mol qilish jarayonlarining uzluksizligini ta’minlash imkonini beradi. Shu sababli, pul, kredit va banklarni alohida fan sifatida o’rganish zaruriyati yuzaga keldi. Ayniqsa, Prezidentimiz tomonidan mazkur tarmoqni rivojlantirish maqsadida qabul qilingan bir qator Farmon va qarorlar, bu hujjatlarda mamlakatimiz iqtisodiyotini yuksaltirishda banklar asosiy bo’g’in hisoblanishi haqida bildirilgan fikrlar sohada tub burilish yasamoqda.

1. Pul va banklar fanining maqsadi, predmeti va vazifalari.

Fanning maqsadi – talabalarga pulning zarurligi, mohiyati, pul nazariyalari va pul aylanmasi, kredit va kredit munosabatlari, banklar va bank tizimi, valyutalarning xalqaro miqyosdagi harakatini tashkil qilish bo’yicha chuqur nazariy va amaliy bilimlar berishdan iborat.

Fanning predmeti- pulning paydo bo’lish sabablari, pul shakllari va turlarining evolyutsiyasi, uning mohiyati va uning namoyon bo’lish shakllari, funksiyalari, qiymat shakllarining evolyutsiyasi, qiymatning shakllari, boshqa iqtisodiy kategoriyalardan ajralib turuvchi o’ziga xos xususiyatlari hamda kredit pullari va ularning turlarini chuqurroq o’rgatadi.