Процессуал ҳужжатларни расмийлаштириш фанидан 2-мавзу: «Фукаролик ишлари буйича судларга такдим этиладиган даъво аризалари ва суд карорлари»

2-МАВЗУ; «Фукаролик ишлари буйича судларга такдим этиладиган даъво аризалари ва суд карорлари »


РЕЖА:

1. 
   «Фукаролик ишлари буйича судларга такдим этиладиган даъво аризалари;
   
2. 
   «Фукаролик ишлари буйича судлар суд карорлари »
   

Ўзбекистон Республикасининг қонунчилигига мувофиқ, низоларни ҳал қилиш турли идораларнинг ваколатларига киради. Мазкур идоралар суд ҳокимиятини амалга оширувчи давлат органлари: фуқаролик ишлари бўйича судлар ва иқтисодий судлар, қонунда назарда тутилган айрим ҳолатларда эса ижро ҳокимияти идораларидир.

Фуқаронинг низо бўйича мурожаатининг фуқаролик судларига тааллуқли бўлишининг энг асосий шарти ҳуқуқий муносабат тарафларининг ҳеч бўлмаганда биттасининг фуқаро эканлигидир (қонунда бундай низоларни ҳал қилиш иқтисодий суд ёки бошқа органларга топширилган ҳоллар бундан мустасно).
Шу билан бирга Ўзбекистон Республикаси Фуқаролик процессуал кодексининг 279-моддасида белгиланган алоҳида иш юритиш тартибида кўриладиган ишлар, шунингдек, қонун билан ваколатига берилган бошқа ишлар фуқаролик ишлари бўйича судларга тааллуқлидир.
Қонунда фуқаролик ишлари бўйича судларга тааллуқли мурожаатлар тоифаларининг қатъий доираси белгиланмаган ва чегараланмаган бўлиб, фуқаро бузилган ёки низолашилаётган ҳуқуқи, манфаатларига тааллуқли ҳар қандай масала билан судга мурожаат қилиши мумкин (қонунда назарда тутилган айрим чеклашларни инобатга олган ҳолда).
Ариза топшириладиган судни аниқлаш масаласи. Судловга тааллуқлилик
Фуқаролик процессуал қонунчиликда белгиланган умумий қоидаларга кўра, аризалар жавобгар доимий яшаб турган ёки доимий машғул бўлган жойдаги судга берилади.
Ташкилотларга нисбатан ариза уларнинг органлари жойлашган ҳудуддаги судга берилади. Ушбу қоидага мувофиқ, судловга ҳудудийлик бўйича тааллуқлилик жавобгарнинг яшаш жойи билан белгиланади. Ўзбекистон Республикаси Фуқаролик кодексининг 21-моддасига кўра фуқаронинг доимий ёки асосан яшаб турган жойи унинг яшаш жойи ҳисобланади.