“Педагогика” фанини ўқитиш бўйича ўқув-услубий мажмуа

Ўспиринлик (15-18 ёшлар). Бу давр ўспиринлар касб-ҳунар коллежлари, академик лицейларнинг ўқувчилари саналадилар. Мазкур давр ўспиринларнинг илк балоғатга етган давридир. Бу даврда жинсий етилиш тугайди. Уларда мустақиллик сезила бошлайди. Ўспиринлар ҳаётга келажак нуқтаи назаридан қарай бошлайдилар. Маданий даражасини орттиришга интилиш кучая боради. ҳис-туйғуларида ҳам ўзгариш юз беради. Ўз-ўзларини тарбиялашга киришадилар. Идеал танлаш ва унга эргашиш кучаяди. Бу даврда улар ўртасида мунозаралар ўтказиш яхши натижа беради. Ўспиринлар ўз гуруҳига интилади. Шунинг учун ҳам ўспириннинг барча интилишлари маълум мақсадга йўналтирилган бўлиши зарур. Уларда ўқув фанларини танлашга нисбатан эҳтиёж кучая боради.
Бу ёш даври ақлий фаолиятнинг ривожланиш даври ҳам саналади. Ўқувчилар ўз фикрларини мустақил ифодалаб, шахслик хислатларини намойиш эта бошлайдилар. Ўқувчилар ўзларини катталардек тутишга, ўзига хослигини намоён этишга ва бошқаларнинг диққатини ўзига қаратишга ҳаракат қилади. Ахлоқий муаммоларни ўз қарашлари нуқтаи назаридан ҳал эта бошлайди. Ҳаёт моҳияти, бахт, бурч, шахс эркинлигини ўз қизиқишлари билан ўлчайдилар. Шу боис уларга катталарнинг беғараз, тўғри йўналиш беришлари муҳим саналади.
Бу даврда ёшлар хулқи ҳам таркиб топа бошлайди. Шахснинг жамоадаги мавқеи, жамоа аъзолари билан мулоқотга киришишлари, турли соҳалар бўйича муносабатни самарали ташкил этишлари етук шахс бўлиб шаклланишларида ўзига хос аҳамият касб этади. Бунда таълим муассасасида фаолият кўрсатаётган Республика “Камолот” ёшлар ижтимоий ҳаракатининг таъсири беқиёс. Зеро, ўспиринлар мустақил ҳаётга қадам қўяётган бўлиб, бу жараённинг тўғри, самарали кечиши уларнинг фаол фуқаро бўлиб шаклланишлари учун пойдевор яратади.
Шахснинг ижтимойилашуви. Шахс ижтимоий муносабатлар жараёнида шаклланади. Бинобарин, таълим жараёнида ўқувчиларга жамиятда бирга яшаш билан боғлиқ бўлган ҳолат ва ҳодисалар ўргатилади. Бу жараёнда ўқувчи ижтимоий муносабатларга киришади, жамият аъзолари билан ўзаро муносабатда бўлади.