“Педагогика” фанини ўқитиш бўйича ўқув-услубий мажмуа

3. “Схема” технологияси ўрганилаётган мавзу, муҳокама қилинаётган масала моҳиятининг асосий хусусият ёки белгиларига мувофиқ схема, тасвир ёки расм орқали ифодалашини таъминлайди. Ушбу технологияни қўллаш талабадан масалага ижодий ёндашишни тақозо этади. Топшириқни бажариш жараёнида талабалар ўрганилаётган мавзу, муҳокама қилинаётган масала бўйича ўзлаштирган назарий билимларини ёдга олади, энг муҳим хусусият ва белгиларни аниқлайди, уларни умумлаштиради ёки таркибий қисмларга ажратган ҳолда схемани яратади. Талабаларда фикрлаш, ижодкорлик кўникмаларини шакллантириш, ривожлантиришга хизмат қилувчи ушбу метод ғоянинг қисқа, аниқ ифодаланиши учун шароит яратади.


4. “Кичик эссе” (французча “essai” – синов, синаб кўриш, очерк, лотинча “exagium” - ўлчамоқ) технологияси кичик ҳажмли, эркин баён усулига эга бўлиб, ўрганилаётган муаммо ёки таҳлил қилинаётган масала юзасидан шахсий таассурот ҳамда тасавурларни ифодалашга хизмат қилади. Мазкур метод талабалар томонидан ўрганилган мавзу, муҳокама қилинаётган масала бўйича эркин фикр билдириш, мазмун-моҳиятини қайта баён қилиш имконини беради. Кичик эссени яратиш жараёнида талабалар мавзу ғояларини умумлаштиришлари, тизимлаштиришлари, туркумлаштиришлари ҳамда хулосаларни баён этиш имконига эга бўладилар. Машғулотлар чоғида мазкур методни қўллаш қуйидаги тартибда йўлга қўйилади: 1) ўқитувчи кичик эссени яратиш учун муаммо ёки масалани танлайди; 2) танланган муаммо, масала билан талабаларни таништиради; 3) талабалар муаммо, масаланинг умумий моҳияти юзасидан фикр юритадилар; 4) талабалар шахсий фикрларини баён этиш усулини белгилаб оладилар; 5) кичик эссени яратадилар; 6) кичик эссе гуруҳ талабаларининг эътиборларига ҳавола этилади; 7) гуруҳ аъзолари эссе юзасидан ўз фикрларини билдирадилар.


3-мавзу: Тарбия мақсади ва вазифалари
Машғулот учун материаллар
I. Талабалар учун топшириқ.
Қуйида берилган саволлар асосида суҳбат ташкил этинг.
1. “Тарбия” тушунчаси қандай маънони англатади?
2. Тарбияни ташкил этишдан қандай мақсад кўзланади?
3. Тарбия жараёнида қандай вазифалар ҳал қилинади?
4. “Ижтимоий тарбия” деганда нимани тушунасиз?
5. Ижтимоий тарбия қандай турларни ўз ичига олади?
6. Педагоглик қандай касб?
7. Тарбия жараёни қандай қонуниятларга таянади?
8. Тарбия жараёнининг ўзига хос хусусиятлари нималарда иборат?