Pedagogika fanidan izohli lug’at. A avtomonitoring

Maxsus qobiliyat – kishidan muayyan sohasiga doir alohida kuchga ega bo’lgan aql-zakovatni, mahoratni talab qiladigan qobiliyat turi.
Ma’lumot – ta’lim-tarbiya natijasida olingan va tizimlashtirilgan bilim, hosil qilingan ko’nikma va malakalar hamda tarkib topgan dunyoqarashlar majmui.
Ma’ruzalar matni – muayyan fanning o’quv dasturi bo’yicha, undagi ayrim mavzularning asosiy va qo’shimcha adabiyotlar ko’rsatilgan, o’z-o’zini nazorat qilishga oid savollar turkumi, mavzuga tegishli tayanch atama va iboralar keltirilgan, doimiy ravishda ilmiy tadqiqot izlanishlari asosida yangilanib turiladigan ta’lim muassasasining ilmiy kengashi tavsiyasi bo’yicha chiqariladigan kichik adadli tarqatma material.
Mahorat – shaxsning tajriba orqali orttirgan xususiyati. Biror sohadagi moslashuvchan ko’nikma va ijodkorlik asosida hosil bo’lgan kasbiy ko’nikmalarining yuqori darajasi, kasbiy mohirlik.
Metod – metod (yunoncha- aynan nimagadir yo’l) maqsadga eltuvchi yo’l, ya’ni maqsadga erishish yo’lidagi xatti- harakatlarning o’ziga xosligi.
Mentalitet (lot. mentalis-aqliy)- ayrim kishi yoki ijtimoiy guruhga xos aqliy qobiliyat darajasi, millat yoki shaxsning mentaliteti ularning o’ziga xos tarixiy an’analari, urf-odatlari, diniy e’tiqodini ham qamrab oladi. Har bir millatning mentaliteti uning tarixi, yashab turgan shart-sharoiti, ijtimoiy faolligi va boshqa bir qancha omillar bilan bog’langan bo’ladi.
Metodika – metodikaga tegishli, qat’iy ketma-ketlikka, tizimga, ilgaridan o’rnatilgan reja (qoida) , tizimga aniq rioya qilish. Metodika biror ishni maqsadga muvofiq o’tkazish metodlari, yo’llari majmuasi.
Metodist – biror o’quv fanini o’qitish yoki tarbiyaviy ishlar metodikasi bo’yicha malakali mutaxassis.
Metodologiya – bilishning ilmiy metodi haqidagi ta’limot. Biror fanda yoki muayyan yo’nalishda yoki sohada qo’llaniladigan metodlar majmuasi.
Me’yoriy hujjat – har xil faoliyat turlari yoki ularning natijalariga taaluqli qoidalar, umumiy qonun-qoidalar yoki tavsiyalarni o’z ichiga olgan hujjat.
Melanxolik – temperament tiplaridan bo’lib, bu tip yengil ta’sirlanuvchanlik, hatto arzimagan narsalar uchun ham juda chuqur tashalnib yurishga moyilligi bilan xarakterlanadi.
Milliy g’oya – muayyan millat hayotiga mazmun baxsh etadigan, uni ezgu maqsad sari yetaklaydigan fikrlar majmui. U millatning o’tmishi, bugungi va istiqbolini o’zida mujassamlashtiradi, uning tub manfaatlarini, maqsadlarini ifodalaydi.
Mifologik (yunoncha mifos- naql, rivoyat, logos- tushuncha, ta’limot) dunyoqarash- ijtimoiy taraqqiyotning eng boshlang’ich davriga xos bo’lgan xalq og’zaki ijodi- naql va afsonalarda gavdalantirilgan ijtimoiy ongning asosiy shaklidir. “Olam qanday paydo bo’lgan? Quyosh, oy va yuiduzlarni kim yaratgan? Bu sir-sinoatga to’la borliqning so’nggi qayerda? Degan savollar odamzotni azaldan qiziqtirib kelgan. Ushbu savollarga odamzot topgan dastlabki javoblar miflarda ifodalangan va ular butun bir mifologik tizimni hosil etgan. Qadimiy turkey xalqlarda ham shunday miflar mavjud bo’lgan.