Paxta tozalash zavodining texnologik jarayonini loyihalash

Xulosa

O’zbekistonda paxtachilikni rivojlantirish eng ilg’or agrotexnologiyalarni qo’llash, xususiyatlari yaxshilangan yangi navlarni yaratish va paxta tozalash sanoatiga innovatsiya ishlanmalarini joriy qilishga asoslangan.
Misol uchun, istiqlol yillarida o’zbekistonlik selektsionerlar paxtaning 162 navini yaratdi, ularning ertapisharligi, hosildorligining yuqoriligi, tolasining tozaligi va uzunligi, zararkunandalarga chidamliligi hamda mamlakatimizning turli hududlari iqlim sharoitiga mosligi bilan ajralib turadigan 45 tasi davlat reestriga kiritilgan va yetishtirish uchun tavsiya etilgan. Bugungi kunda dalalarimizda yetishtirilgan hosilning 83 foizini “oliy” va “yaxshi” navli paxta tolasi tashkil etadi. O’zbek paxtasi jahon bozorida talab etiladigan va asosiy sifat ko’rsatkichlaridan biri bo’lgan mikroneyr darajasiga to’liq javob beradi.
Paxta tozalash sanoati ham jadallik bilan modernizatsiya qilinmoqda, ishlab chiqarishga eng zamonaviy texnologiyalar joriy etilmoqda. So’nggi yillarda mamlakatimizning turli hududlaridagi barcha paxta tozalash zavodlari rekonstruktsiya va modernizatsiya qilindi. Buning natijasida ishlab chiqarish hajmi 22 foizdan oshdi, tola sifati ham ortdi.
Chigitli paxtani dastlabki ishlash sanoatini yanada rivojlantirish, shunigdek mamlakatimiz paxta sanoatida qo’llaniladigan texnika va texnologiyalarni takomillashtirib, ishlab chiqarish unumdorligi va samaradorligini oshirib, iqtisodiy samaraga erishish maqsadida ushbu bitiruv-malakaviy ishini bajarishda chigitli paxtani dastlabki ishlash jarayonida qo’llaniladigan tozalagichlarning konstruktsiyasini o’rganib, tahlil qilib chiqildi. Iflosliklarga qo’shilib ketgan chigitli paxtani sifatli tozalash maqsadida RX-1 markali paxta regeneratori konstruktsiyasi o’rganib chiqilib, uni takomillashtirish bo’yicha izlanishlar olib borildi.
Bitiruv-malakaviy ishida shuningdek “Hayot faoliyati xavfsizligi” qismi ham ko’rib chiqilgan bo’lib, unda ishlab chiqarish korxonalarida sodir bo’ladigan shovqinni kamaytirishga qaratilgan chora – tadbirlar, titrashni to’sish vositasini hisoblash, texnologik jarayonlarni xavfsizligini ta’minlovchi vositalar, elektr tokidan himoyalanish, yong’inga qarshi oraliqlar, to’siqlar va boshqalar o’rganilib chiqilib, ular to’g’risida ma’lumotlar berilgan.