Гистология цитология ва эмбриология проф. Қ. Р. Тўхтаев таҳрири остида

Моноцитлар.
Моноцитлар қоннинг энг йирик ҳужайралари 
ҳисобланади. Уларнинг катталиги суртмаларда 20 мкм гача, қонда эса 9-12 
мкм гача бўлади. Моноцитлар сони етук организмда умумий лейкоцитлар 
миқдорининг 6-8% ини ташкил этади. Моноцитлар ядроси шаклининг турли 
хилда бўлиши билан характерланади - кўпчилик ҳолларда ядро ловиясимон 
ѐки тақасимон шаклга эга бўлади. Хроматин сийрак, ноте-кис тўр шаклида 
жойлашиб, Романовский усули билан бўялганда қизғиш бинафша рангга 
бўялади. Баъзан 1-2 та оксифил бўялган ядроча кўринади. Моноцитлар 
цитоплазмаси базофил бўялиш хусусиятига эга бўлиб, уларнинг базофиллиги 
лимфоцитларга нисбатан кўпроқ ифодалангандир. 
Цитоплазма Романовский усули билан қисман кўк, қисман бинафша 
рангга бўялиб, бу цитоплазмага характерли кўкиш-бинафша тус беради. 
Моноцитлар цитоплазмасида нафис махсус азурофил донадорлик, баъзан эса 
йирикроқ базофил бўялувчи донадорлик ҳам учраши мумкин. Электрон 
микроскопда моноцитлар цитоплазмасининг лимфоцитларга нисбатан 
ҳужайра органеллаларига анча бой эканлиги кўзга ташланади (расм 4.4). 

---

Митохондриялар кўп сонли бўлиб, эндоплазматик тўр ва Голжи 
комплекслари яхши тараққий зтган. Ҳужайра қобиғи остида жуда кўп 
пиноцитоз пуфакчалар жойлашиб, баъзан уларда фагоцитоз қилинган 
заррачалар учрайди. Бундан ташқари, суст электрон зичликка эга бўлган, 
катталиги 0,1-0,5 мкм келадиган доначалар ҳам бўлиб, улар ѐруғлик 
микроскопида кўринадиган азурофил доначаларига мос келади. Бир ҳужайра 
цитоплазмасида 150 га яқин донача бўлиши мумкин. Доначалар таркибида 
кислотали фосфатаза, пероксидаза ва арилсулфатаза ферментлари бўлиб, 
улар доначаларнинг ўзига хос лизосомалар эканлигидан далолат беради. 
Моноцитлар актив ҳаракат қилиш қобилиятига эга бўлиб, уларнинг асосий 
вазифаларидан бири фагоцитоздир. Улар қонда 2-3 сутка давомида айланиб, 
сўнгра тўқималарга ўтади. Тўқималар ва органларда моноцитлар микромуҳит 
таъсири остида турли хил макрофагларга (эркин макрофаглар, алвеоляр 
макрофаглар, жигарда Купфер ҳужайралари, суякда остеокластлар, нерв 
тўқимасида глиал макрофаглар ѐки микроглия ва бошқаларга) айланади. 
Барча макрофагларни моноцитларнинг авлоди деб ҳисоблаш мумкин. 
Шу туфайли моноцитлар мононуклеар фагоцитлар системасининг асосий 
ҳужайраларидир.